KUCHING: Kenyau penyakit rabies udah ngerekai berengkah Julai 2017, bisi 33 kes pemati udah dirikodka di Sarawak.
Sapit Kepala Menteri ti mega Chairman Komiti Penyangga Penusah Nengeri (JPBN) Datuk Amar Douglas Uggah Embas madahka ninting taun penyakit rabies udah nabanka urung 50,000 iku nyawa mensia di serata dunya.
“Kes pemati tu ulih diseliahka nyema sida begaut meresi abi ketup tauka jampat ngusung palan berubat.
“Rabies ngerampit ari abi tagup tauka keramak jelu kelebih agi ukui,” ku iya.
Teks jaku Uggah dibacha Menteri Kaunsil Kandang Menua enggau Pengawa Berumah Datuk Sri Prof Sim Kui Hian beserimbai enggau Program Ngintu Hari Rabies Sedunya 2021 ti dipanchar terus nengah Facebook Ukas, kemari.
Ku iya, pengerakai penyakit rabies mega ulih diseliahka nengah penyedar sentang penyakit tu.
“Komuniti mesti sedar ke pengerekai penyakit rabies lalu bebendar nagang diri ari bulih penyakit nya.
“Tu nyengkaum penemu pasal nagang rabies ngerampit jelu, lebuh kitai nemu jelu nya bisi kelai rabies kitai patut nemu nama pekara ti patut digaga,” ku iya.
Kelimpah ari nya, iya mega madahka komuniti mega patut nemu chara nuchi abi tagum ngena sabun sepengelama 15 minit sebedau berubat ngagai klinik.
Pia mega, iya meransang mensia mayuh ngulihka vaksin rabies ‘post – exposure prophylaxis’ (PEP) lebuh sida ditukuka udah kena rampit penyakit nya.
“Enti abi tagum diberesi manah enggau bulih vaksin PEP nya, nyau deka 100 peratus kes bebadi ketegal rabies ulih diseliahka,” ku iya.
Berebak enggau nya, iya mega meransang ngambika mensia mayuh sedar pasal guna nuchuk vaksin rabies ngagai ukui dikena ngurangka penyakit rabies ngerekai.
“Taja mayuh bansa jelu ulih mai rabies, tang ukui entara jelu ti balat ngerikodka kes rabies enggau nagum mensia.
“Nya alai, perintah bebendar ngatur program meri vaksin rabies ngagai ukui enggau program penyedar nagang penyakit tu,” ku iya.
Sama bisi datai Direktor Servis Veterinar Sarawak Dr Adrian Susin Ambud, Chairman Kaunsil Mengeri Padawan (MPP) Lo Khere Chiang, Residen Bagi Menua Kuching Sherrina Hussaini, Datuk Bandar Kuching Utara Datuk Wee Hong Seng enggau ke bukai.
