SIBU: Ketegal amu mata, siku pengajar beumur 48 taun napi pengerugi lebih RM8,000 pengudah iya ditipu meli telefon binching nengah sebuah serikat bebelika barang online, ditu ensanus.
Ketuai Polis Pelilih Sibu ACP Stanley Jonathan Ringgit madah, pengajar nya nerima pesan ari siku lelaki ngaku diri pengari serikat bebelika barang nengah online nya.
Iya madah, saspek madah ngagai pengajar nya, iya udah meli telefon binching berega RM8,000 ari sida tang pengajar nya madahka iya nadai meli telefon nya sebedau tu.
“Udah nya, saspek mantaika resit ngena nama enggau lumur akaun bank iya lalu madahka diri deka mulaika duit pengudah pengajar nya enggai meli telefon nya,” terang Stanley nengah sebengkah penerang, ditu tadi.
Stanley madah, saspek mega madahka pengajar nya iya meseti nitihka jaku iya ngambi ulih mulaika duit nya baru taja duit dalam akaun iya nadai diputung.
Ku iya, ketegal amu mata deka ngambi duit pechuma nya tama ngagai akaun iya, urung pukul 7.43 malam ba hari ti sama, pengajar nya nerima empat kod TAC ungkup online banking.
“Lebuh iya meresa akaun, dia iya tepedaka duit RM8,250 udah dipindah dua kali ngagai akaun e-wallet orang bukai.
“Pengajar nya lalu ngaga ripot polis kena 12 April tu tadi pengudah iya sedarka diri udah ditipu,” tandu iya.
Nya alai, kes nya deka dipansik nitihka Seksyen 420 Kanun Keseksaan.
