KUCHING: Bala ketuai balai bomba dilalau regas agi nyereta program ke bisi diatur begulai enggau komuniti ba sitak diri.
Direktor Opis Bomba enggau Penyah Penusah Malaysia (JBPM) Sarawak, Khirudin Drahman madah, semua sida enda patut semina duduk ba opis aja.
“Ketuai balai mega udah diberi notis awakka regas nyereta pengawa ti bisi kaul enggau aktiviti bomba ba sitak ke dijaga sida.
“Kebuah pia, program bomba enggau komuniti beguna amat diatur dikena nyeliahka penusah angus nyadi balat nyema bisi tasah,” ku iya.
Iya madah munyi nya rambau program ba Indu Opis Bomba enggau Penyah Penusah ditu, seharitu.
Khirudin madah, bepelasarka rikod ari taun 2015 nyentuk 2020, peratus rumah angus bisi kurang, peratus pintu bisi ke mujur diselamat mega niki dalam timpuh nya.
“Peratus pintu ulih diselamat niki laban mensia mayuh udah bisi penemu chara nagang angus ba renggat tumu.
“Penyikar sida beguna amat dikena nyeliahka rumah angus enggau pengerugi besai bekau ari penusah nya,”ku iya.
