KKKWPK deka ngerembai servis ngagai Baram

KUCHING: Opis Menteri Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit (KKKWKPK) deka ngerembaika agi servis penyambung ngagai menua ke pedis dilawa di Baram.

Menteri iya, Datuk Fatimah Abdullah madah opis menteri iya deka bejalaika tanggungpengawa ke diepnggi lima buah tadika komuniti Penan ba pelilih Apoh enggau Tutoh.

“Lima buah tadika komuniti Penan tu udah ditumbuhka nengah projek Tanggungpengawa Rama Korporat (CSR) Petronas di Long Kawa, Long Krangan, Long Jenalong, Long Leng enggau Ba’ Selulong.

“Lalu naka ke diatu, empat buah tadika tu udah tembu, semina ba Ba’ Selulong aja apin tembu,” ku iya.

Fatimah madah munyi nya rambau nyimpul mosyen ari KKKWKPK ba Aum Dun Ke-18 ditu, kemari.

Datuk Fatimah Abdullah

Nangkanka nya, ku Fatimah, opis menteri iya udah bejalaika tanggungpengawa ba 18 buah taska enggau 73 buah Tadika SeDidik Sdn. Bhd.

“Tu chara keterubah dikena kami nyeririska pengawa bejalaika program pemansang tumu anak mit engeman enggau aspirasi sereta guna Sarawak nyengkaum sukut perengka guna, kurikulum enggau personel.

“Tadika enggau Taska SeDidik deka dikemansangka nyadi pelin ti ulih dititih ukai semina di Sarawak tang mega ba renggat nasional sereta renggat entarabansa,” ku iya.

Ku Fatimah, opis menteri iya mega beratika pengawa ngaga Taska ba endur gawa ngambi ngemuntangka sida pengereja pengawa nganjung anak sida ngagai Taska semak enggau endur gawa.

“Naka tu, bisi 18 buah Taska ba palan gawa udah ditumbuhka ngagai ejensi sereta opis di Sarawak ti ngena agih belanja ari Perintah Sarawak enggau ejensi sida empu.

“Ba taun tu, Opis Pengintu Pengelantang Pendiau enggau Komuniti Sarawak (JKMS) udah nerima agih belanja Perintah Besai RM515,000 ngagai Taska ba palan pengawa perintah di JKMS, Universiti Malaysia Teknologi MARA (UiTM) Pampang Samarahan, Sepital Sibu enggau Penjara Besai Limbang,” ku iya.

Pia mega, ku Fatimah ba pengawa sida nambahka kualiti Institusyen Pelajar Tumu Anak Mit (IPAKK) udah ngagihka belanja Geran Khas Ninting Taun (GTK) RM 16 juta ba taun tu.

Tiap IPAKK ti udah rejista enda ngira ba baruh Perintah Nengeri, Perintah Besai tauka swasta deka diberi agih belanja RM 5,000 setaun ti diberi berengkah Jun tu dikena sida bejalaika inisiatif IPAKK.

Suara Sarawak