MIRI: Opis Menteri Pengerai Malaysia (KKM) deka ngena manah agih belanja tambah sepenyampau RM50 juta ari Perintah Sarawak dikena nyeleti klinik repuk.
Sapit Menteri KKM, Datuk Lukanisman Awang Sauni madah, RM50 juta deka dikena nyeleti tujuh nyentuk lapan klinik repuk.
Iya madah, agih belanja RM3 juta udah diberi ngagai Sepital Besai Sarawak (HUS) dikena nangkir begian emijensi.
“Tu mandangka pengeran Perintah Sarawak ti betuai ke Premier Sarawak, Datuk Patinggi Tan Sri Abang Johari Tun Openg mutar isu klinik repuk di nengeri tu.
“Enti kitai (KKM) enggau Direktor Opis Pengerai Sarawak, Dr Veronica Lugah sereta raban iya mujur bejalaika pengawa tu lengkas, aku meri jamin Premier Sarawak enda kakang ati meri agih belanja tambah bejuta ringgit dikena nyeleti fasiliti pengerai di selampur Sarawak,” terang iya.
Lukanisman mansutka jaku nya rambau Pengerami Makai Lemai serimbai Jubli Intan Ke-60 Sarawak Medical Servis Union (SMSU) di sebuah hotel tebilang ditu, ensanus.
Kaban Parlimen Sibuti nya beterima kasih ngagai SMSU ti berengkah beoperasyen kenyau ari taun 1964 ti chakah negi pengelantang staf pengerai enggau orang gawa perintah ti bukai di Sarawak.
Iya mega meransang SMSU bekerejasama enggau sektor peribit dikena nentu sektor servis pengerai ulih dikerembai enggau ditegpka agi. – EDISI UKAS
