SPAOH: Tuai Raban Bansa enggau Genturung Pendiau (KMKK) di Bukit Saban ditangkan chakah agi besaup mutar penanggul suntuk bekal ai ke majak nyadi ketegal hari kemarau diatu.
Sapit Premier Sarawak, Datuk Amar Douglas Uggah Embas madah, kerejasama KMKK enggau ejensi perintah deka nentuka semua pengawa bekaul ulih dipejalaika enggau mujur kelebih agi baka nganjung bantu ai ngagai sida ti napi penanggul nya.
Iya ke mega Kaban Kunsil Nengeri (ADUN) Bukit Saban madah, pengawa betemu enggau KMKK diatur dikena ngulihka penerang ke amat bekaul penusah ke amat nyadi di menua sida. “
Tuju program tu iya nya dikena kitai besaup nentu pengawa mutar isu ai ketegal kemarau, kelimpah nentuka ejensi bekaul ulih bejalaika pengawa seninjik sida nerima peminta bantu,” ku iya maya ngulu program berandau nya ditu, empai lama.
Kelimpah ari nya, Uggah mega madah, rayat mayuh ulih ngenataika peminta bekal ai ngagai Opis Pengintu Pengelantang Mensia Mayuh (JKM). Berebak enggau nya, Kaban Parlimen Betong, Datuk Dr Richard Rapu ngelalau semua ngambi ke nyikap diri napi kemarau panjai tu.
Ku iya, penerang silik ari Tuai Rumah beguna dikena ngelengkaska agi bantu dianjung.
Nya alai, iya madah, bala tuai rumah meseti nentuka peminta bantu dikenataika enggau lengkas ketegal ngira pengelantang peranak pegai sida. — EDISI UKAS






