SIMUNJAN: Ketuai Komuniti enggau Ketuai Raban Bansa (KMKK) Pelilih Simunjan meseti nyadi mata enggau pending ngagai Perintah Sarawak.
Kaban Kunsil Nengeri (Adun) Simunjan Awla Dris madah nyadi siku KMKK, sida meseti chakah enggau ngaul kerejasama enggau ejensi perintah ungkup pengelantang rayat renggat baruh.
Ku iya, sida meseti meri servis ke ngasi enggau manah agi ngagai komuniti kelebih agi meri penerang pemadu baru pasal polisi enggau perambu Perintah Sarawak.
“Pia mega, Ketuai Komuniti enggau Ketuai Raban Bansa ti diaku meseti nyikap diri ngena penemu enggau pengelandik nguna teknologi kemaya hari,” ku Awla.
Iya mansutka jaku nya lebuh bejadi Pejalai Program Integriti Renggat 10/2019 Pelilih Simunjan enggau Licha KMKK Pelilih Simunjan ba Dewan Mesra Pelilih Simunjan, ditu tadi.
Nambahka nya, iya merambu ngagai Opis Pelilih Simunjan ngambi ngatur aum ninting bulan begukau enggau KMKK kelebih agi ba kandang menua Simunjan.
Ku Awla, nengah aum tu bala ketuai komuniti enggau ketuai raban bansa ulih ngenataika penanggul ditapi tauka sebana rayat ba renggat baruh.
“Aku mega dekaka bala ketuai komuniti enggau ketuai raban bansa ngempung penerang pasal genturung pendiau sida baka penyampau tubuh peranak, penyampau rumah, penerang pasal berapa pintu enggau ke bukai ngambi nyadi siti profil lalu dianjung ngagai Opis Pelilih Simunjan.
“Aku empu mega deka ngulu aum ninting bulan nya lalu profil tu tau ngasuh aku bisi penerang ke betul ungkup semua genturung pendiau ke bisi ba Simunjan,” terang iya.
