SIBU: Rintai baru komiti Parti Keadilan Rakyat (PKR) Pampang Kanowit deka ditumbuh pengudah komiti sida sebedau tu ungkup renggat 2018-2021 padam.
Ex-mandal ketuao pampang iya Satu Anchom deka ngiring komiti baru nya numbuhka komiti baru.
Iya madah, komiti pampang sebedau tu automatik padam pengudah chairman iya enggau bala kaban komiti ke bukai pansut ari parti.
“Diatu, kami benung ngatur komiti baru ungkup PKR Kanowit. Aku deka ngiring komiti baru tu lalu numbuhka tim. Dalam komiti sebedau tu, aku mangku pengawa nyadi mandal ketuai PKR Pampang Kanowit.
“Kelimpah numbuhka raban tim baru, aku mega diasuh negapka pampang PKR Kanowit,”ku iya maya dirandau, kemari.
Sebengkah penerang ke dibantai dalam akaun media rama iya kemari, dia iya madah diri begulai enggau bala bakih sereta penyukung PKR di Kanowit deka besaup negika pengawa ungkup pemansang sitak Kanowit.
“Ngagai bala penyukung PKR di Kanowit, aku nesau semua kita terus jenuh laban ketuai baru deka numbuhka komiti baru dikena ngidupka baru PKR Pampang Kanowit.
“Beri aku awak mimit lalu aku ngarapka semua kita terus jenuh enggau besabar,” ku iya.
Berebak enggau nya, Satu madah iya diatu benung ngiga palan Opis PKR ke baru ba
Kanowit lalu deka lengkas madahka pasal pekara nya jemah.
“Semua kita rayat Kanowit, terus beserakup enggau PKR laban PKR Kanowit deka mai agenda pemansang ke mungkur semua enggau lebih manah ungkup rayat ditu,” ku iya.
Ba pengawa Bepilih Besai Ke-14 (PRU14) suba, Satu kala bediri minta pilih ngena tikit PKR di Kanowit, iya bulih penyampau undi 5,240 undi, lalu Datuk Aaron Ago Dagang bulih 9,552 undi ngena tikit Barisan Nasional (BN) sereta terus ngetanka penuduk Parlimen Kanowit.
