KUCHING: Sebengkah komiti khas udah ditumbuh bejalaika pansik mayuh penanggul ditapi komuniti Iban ti seranta ba mengeri nyengkaum penanggul setinggan enggau pendam.

Pengari komiti nya, Wit Malang madahka sida deka ngempung penerang pasal raban diselinting tu.

“Kami udah berandau enggau sekeda raban lalu sida sedia nempa kaul kerejasama minta bantu ari Perintah Sarawak,” ku iya nerang.

Sapit Kepala Menteri Datuk Amar Douglas Uggah Embas udah dipadu nyadi ketuai komiti khas tu seraya Temenggong Datuk Bernard Agan nyadi chairman lalu sapit iya, Leftenan General (B) Datuk Stephen Mundaw.

Uggah mansutka jaku tu rambau Pengerami Makai Lemai diatur Gerempung Ketuai Komuniti enggau Tuai Rumah Raban Bansa Iban Bagi Menua Kuching (Pemaik) kena 11 Julai tu tadi.

Iya mega ngelalau gerempung nya nyidi enggau ngempung penerang pasal komuniti Iban ti begunaka bantu.

Penerang tu patut mungkur penanggul ditapi kelebih agi sida ke mindah bekuli ba mengeri besai lalu ngentapka diri ditu, nyengkaum pengawa berumah enggau penanggul rama.

Iya mega dekaka asil penerang tembu digempung ujung bulan tu lalu deka beratika baka ni chara perintah ulih mantu mutarka penanggul sida tu.