KUCHING: Siti kompeni besai antarabansa ke ngembuan penuduk tegap ba renggat global diatu benung nyidi peluang meranak puku di Sarawak.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, kompeni nya bisi penuduk ke tinggi ba Forbes lalu endang tebilang ba renggat global.
Taja pia iya empai ulih nerang sapa bagi kompeni nya naka ke diatu.
“Aku empai ulih madah, tang bisi kompeni besai diatu benung beratika Sarawak.
“Kira dua minggu agi, sida bisi datai ke Sarawak kitu, ukai kompeni mit,” pia ku iya.
Iya bejaku munyi nya maya Pengerami Makai Lemai Basa Tuai Pegawai Eksekutif Kumpulan Sarawak Energy, Datuk Sharbini Suhaili ke deka pinchin kena 31 Oktober tu ditu, Hari Tiga.
Datuk Patinggi Abang Zohari madah, semua nya mandangka Sarawak ngembuan pengulih nyadi menua ditapat pemeranak puku industri antarabansa bepun ari transformasyen sektor energi ke benung dikemansangka perintah nengeri.
Ku iya, ubah guna energi global ke majak bekenaka pun penatai energi beresi bela meri awak ngagai Sarawak nguna pun penatai energi ulih dikena baru enggau gas enggi negeri tu.
“Landskap ekonomi udah berubah laban industri maya hari begunaka energi gadung.
Lalu ketegal nya mega kitai benung berunding sereta besedia ngena rizab gas ke bisi dikembuan kitai,” ku iya madah bareu.
Bela datai maya nya Sapit Premier Sarawak Datuk Amar Profesor Dr Sim Kui Hian, Menteri Utiliti enggau Telekomunikasyen Sarawak Dato Sri Julaihi Narawi, Sekretari Perintah Sarawak Datuk Amar Mohamad Abu Bakar Marzuki, Sapit Menteri Utiliti enggau Telekomunikasyen (Sarawak Energy enggau PETROS) Datuk Ibrahim Baki, bala Kaban Komiti Direktor Sarawak Energy SEB sereta pemesai ke bukai. — EDISI UKAS
