KUCHING: Bansa Dayak meseti dibai sereta ba jeman pemansang Sarawak lalu ukai semina nyadi pengemata aja. Sapit Presiden SDNU, Ir. Christopher Gira Sambang madah, diatu Sarawak benung nyingkang ngagai siti jeman pemansang baru ba baruh iring Premier Sarawak, Datuk Patinggi Tan Sri Abang Johari Tun Openg.
“Nengeri kitai benung nuju jeman ke mua ti tampak agi enggau pemansang ekonomi gadung, teknologi baru, kuasa ulih dikena baru enggau ekonomi digital.
“Tang ba semua pemansang tu, kitai enda tau enda ingat ke siti pekara iya nya pemansang Sarawak meseti mai sereta bansa Dayak.
“Bansa Dayak enda tau semina nyadi pengemata ba pemansang, kitai meseti nyadi sebagi ari agen pemansang nengeri tu,” ku iya.
Gira bejaku munyi nya rambau bejadi Pengerami Ngintu 62 Taun SDNU Pampang Siol ditumbuh ba Christian Ecumenical Worship Centre Kuching ditu, ensanus. Ku iya, penumbuh 62 taun SDNU Pampang Siol nyadi kelai timpuh ti panjai sereta pejalai sejarah ngagai pekara ti ditegi enggau pengarap raban tuai dulu suba.
“Bala penumbuh SDNU ngarap anak Dayak meseti diberi peluang sebela ba pelajar.
“Sida ngarap raban bansa Dayak ulih bediri sama tinggi enggau bansa bukai ba Sarawak.
“Malam tu (ensanus), kitai meda pekara ti ditegi sida nya lalu ditampung kitai diatu, nya ti nyadi semangat kitai ngagai jeman ke mua bansa Dayak,” ku iya.
Iya andal SDNU Pampang Siol terus ngaga mayuh aktiviti sereta merambu jeman ke mua nembiak rebak baru. “SDNU ukai semina gerempung aja tang nyadi rumah penyerakup raban bansa Dayak.
“Nyadi palan endur kitai berunding enggau nyadi palan endur kitai ngaga perambu ungkup nembiak rebak baru dudi hari,” ku iya.
Tandu iya, bansa Dayak meseti berani ngaga ubah sereta ngadaka mayuh agi anak Dayak ti nyadi orang pandai baka lutur, injinir, saintis, orang dagang enggau tuai bepenau dudi hari.
“Aku ngarap bansa kitai kering ukai semina bansa ti ngingatka sejarah lama tang bansa Dayak ti benung ba jalai ti betul kena nurai sejarah pemansang Sarawak,” ku iya.
Sama bisi datai, Penyanding Penemu ba Opis Premier Sarawak, Datuk Amar Jaul Samion, Chairman SDNU Pampang Siol, Pani Igoh enggau bala bukai.
