MUKAH: Nembiak Politeknik Mukah (PMU) mujur menggi anugerah khas akim ungkup Pekit Dagang Pekara Rama ba Kampus The Ship, Pulau Pinang empai lama.
Pekit nya diatur Opis Politeknik enggau Kolej Komuniti nengah kerejasama PKT Sdn Bhd.
Bisi 10 nembiak PMU udah bejalaika projek ngaga sos chabi ti diasilka raban Orang Nyelai Pendiau (OKU) ari Palan Penyuman Dalam Komuniti (PPDK) OKU Gemilang Jepak, Bintulu ngena chap dagang Sos Chabi Nana.
Mentor Sos Chabi Nana, Ahmad Syakir Kadimin madah, raban OKU kurang diberi perati sereta suah dikelaung komuniti ketegal pengurang sida.
“Tunga kuing raban nya bepanggai penuh ba pengawa dagang ti udah tentu enda bisi belama.
“Nya alai, kami ngena inisiatif tu meri penyedar ngagai komuniti bekaul pengulih raban OKU sereta meri peluang ngagai raban nya begulai bejalaika aktiviti ekonomi,” ku iya.
Pia mega, nembiak PMU udah matih pedagang OKU ngaga sos chabi, ngelaku enggau nyadung produk nya begulai.
Pekit ti diatur pengelama lima bulan nya ngemataka pengeransing nembiak PMU ngubah nasip enggau nyungkak penatai pemisi ngagai raban OKU nya ti mungkur sida ti napi penyakit syndrome down, autism enggau lubah belajar.
Nya dikena nentu raban nya ngasai sereta ngembuan pengidup ti manah agi baka komuniti bukai.
Sepanjai pekit nya diatur, bisi 7,000 botol Sos Chabi Nana mujur dijual ba pasar Mukah, Bintulu enggau Miri.
