Komuniti Sikh nerima agih RM3.5 juta

KUCHING: Komuniti Sikh nerima agih belanja RM3.5 juta ari perintah nengeri dikena ngaga begunan enggau perengkaguna.

Kepala Menteri Datuk Patinggi Abang Johari Tun Openg madah bantu tu dikena ngaga begunan baru, nyeruri begunan kuil lama, ngaga palan pelajar nembiak Sikh enggau ke bukai.

“Raban bansa tu patut dibantu ba pemansang rama awakka numbuh siti penyerakup menua.

“Kemari (ensanus) aku ngagai raban bansa Teochew lalu pagi tu (kemari) kitu mantaika penyerakup bisi ba menua tu,” ku iya.

Abang Johari bejaku munyi nya ba Pengerami Begempuru Komuniti Sikh enggau Vaisakhi ba Kuil Sikh ditu, tadi.

Ku iya, pemeri agih belanja mega tau dikena nembiak rebak baru belajar baka tanda enggau tabuh asal sida.

Pia mega, iya meri fokus deka ngangkat Kuching nyadi rampa menua ti likun bepun ngena bas hidrogen.

“Kitai deka Kuching nyadi palan rampa menua ti likun nengah bas hidrogen.
“Nengah bas tu rampa menua kitai deka selamat pengidup kitai mega meruan,” ku iya.

Udah tembu bejaku dia Abang Johari nyerah ke check RM3.5 juta ngagai Presiden Gerempung Kuil Sikh Sarawak Dr Kalwinder Sing Khaira seraya nundi iya nadai berutang agi.

Dulu agi ari nya, Dr Kalwinder madah sida udah ngelangkar pelin ngaga begunan baru dikena ngaga sekula Punjabi ti ngembuan balai, palan macha buku sereta palan matih nembiak ti dikumbai Gurdwara Sahib.

“Gurdwara Sahib digaga ba tengah mengeri pesaka asal lalu nyema udah bisi pemendar kereja ngaga begunan tu dijangka deka tembu 15 ngagai 18 bulan,” ku iya.

Sama datai Menteri Kaunsil Kandang Menua Datuk Prof Dr Sim Hui Kian enggau ke bukai.

KENA MANAH…Datuk Patinggi Abang Johari Tun Openg (dua kiba) nyuaka check ngagai Dr Kalwinder Sing Khaira ba Pengerami Begempuru Komuniti Sikh enggau Vaisakhi ba Kuil Sikh ditu, tadi. -Gambar NADIM BOKHARI