Konspirasyen politik patut diketu

Budaya kamah enggau keji semina ngemai pengerugi ngagai menua

KUCHING: Parti Keadilan Rakyat (PKR) ngutuk klip video kamah ti dikerembai ngaul siku ketuai tetinggi parti enggau perintah berengkah ari kemari.

Mandal Presiden PKR Zuraida Kamaruddin ngumbai ulah baka nya main politik kamah ti balat ngasuh enda lantang ati sereta tau ngasuh pengawa nempa Malaysia baru tejanggal.

“Aku deka madahka pengandal diri sentang kredibiliti, integriti enggau personaliti ketuai ti dipetenah nya endang nadai bebagi.

“Pengandal aku tu belalauka ulah orang betenahka iya ti enda ulih dikearap sereta ditemu bisi kaul manah enggau bala penyakal,” ku iya ba penerang tadi.

Zuraida Kamaruddin

Iya ti mega Menteri Pengawa Berumah enggau Kaunsil Kandang Menua nyemetak madah sebarang konspirasyen politik dikena munuh karakter baka tu patut diketu tekala nya.

Berebak enggau nya, Zuraida ngarapka piak bekuasa ulih bejalaika pansik sereta ngemai pesalah ke mua kort.

Kaban Kaunsil Ketuai Besai PKR, Zakaria Abdul Hamid mega ngumbai video ti dikerembai nya semina petenah, tuju ti kamah enggau konspirasyen politik.

Ku iya, konspirasyen politik betenah betandu baru baka ditapi Datuk Seri Anwar Ibrahim, 20 taun ke udah.

“Pengawa ngerembaika video pemadu baru ngena chara teknologi pemadu baru nukar gambar ti ngasuh kitai enda lantang sereta nguji ngamahka nama Perintah Pakatan Harapan (PH) sereta PKR.

Zakaria Abdul Hamid

“Aku enggau bala bakih bukai nulak budaya politik kamah enggau ngasuh keji baka nya. Kami ngemai semua rayat Malaysia beserakup ngelaban enggau nulak budaya politik baka tu.

“Tegika pengawa ngena penemu enggau pengelandik bejaku. Pekit ngena chara ti patut sereta mantaika pemintar runding diri empu,” ku iya ba penerang sehari tu.

Sekretari Besai PKR Datuk Seri Saifuddin Nasution Ismail ba penerang dulu ari nya ngansak pengawa ngerembaika video nya diketu tekala nya.

Iya ngumbai gaya enggau chara bepolitik baka tu enda ngemai sebarang penguntung ngagai rayat enggau menua.

“PKR netapka penemu sereta tetap nulak sebarang main politik kamah kelebih agi maya perintah baru PH udah dipilih rayat belalauka semengat agenda reformasyen dikena mantu rayat enggau ngemansangka menua,” ku iya.

Ku iya nambah, PKR nyadi sebagi ari parti komponen PH deka semampai fokus mantu perintah besai ngelangkar polisi enggau program ungkup rayat.

Datuk Seri Saifuddin Nasution

Suara Sarawak