Kontak semak Kluster Pasai dipinta meri kerejasama penuh

BELURU: Menteri Muda Kaunsil Kandang Menua enggau Pengawa Berumah, Datuk Dr Penguang Manggil udah limpang ngabas pengawa ngempang jalai ba tiga genturung.
Tiga batang jalai ti diempang nya ba Rumah Apong, simpang Sungai Liam, simpang Sungai Entulang enggau Balai Polis Beluru.
Berebak enggau nya, Penguang mega udah nyuaka bantu ai irup, pemakai enggau sengkabung mua ngagai raban ti gawa dia.
Ngena awak nya iya berandau enggau raban ti gawa lebih agi bekaul enggau kereban diguna sida lebuh bejalaika pengawa.
“Kenyau ari kemari, Atur Mindah Betagang (PKP) dipejalai ba Rumah Apol, simpang Sungai Liam enggau simpang Sungai Entulang.
“Kebuah pia laban sida ditemu bisi kontak semak Kluster Pasai.
“Ari nya, aku ngelalau peranak ditu meri kerejasama penuh enggau nitihka gerah ari raban ti ngempang jalai alun enggau raban ari Komiti Penyangga.
“Kerejasama kita beguna amat nentuka pengerekai Covid-19 ulih pukas lalu kitai ulih ngereja semua pengawa baka selama,” terang Penguang nengah penerang ba Facebook iya, kemari.

Suara Sarawak