SIBU: Konvoi Kembara Sarawak Merdeka udah singgah pengelama dua jam ba Rumah Bangit Batu Burak, Bawang Assan, ensanus.
Rumah Bangit nyadi penyangkai enda lama ketiga ba Bagi Menua Sibu pengudah Selangau enggau Stadium Mit Sibu.
Penatai konvoi ti diulu pengari ari Opis Menteri Nembiak, Lumba enggau Main sereta Pemansang Orang Dagang (MYSED) Sarawak, Jee Chin Fu nya diambat Senator Robert Lau Hui Yew sereta peranak ba genturung pendiau dia enggau gaga ati urung jam 12 tengah hari.
Ngelansa ba pengawa ngambat konvoi, Lau madah, sitak Bawang Assan enda tinggal ari pemansang infrastruktur pemun ti beguna baka bekal ai, bekal kuasa karan enggau jalai alun.
Ku iya, pemujur nya nunjukka pengawa perintah ti ngemansang genap sitak di menua tu.
Sama datai Sapit Residen Bagi Menua Sibu, Christopher Ranggau Unting, pengari Pegawai Pelilih Sibu, Temenggong Stanley Geramong enggau Penghulu Ali Jampi.
