Kpg Perpat nerima pemansang

KABONG: Peranak Kampung Perpat, Kabong deka ngasai pengidup meruan agi sebaka enggau genturung pendiau bukai enda lama agi.

Kaban Parlimen Saratok, Ali Biju madahka juluk ati peranak ditu deka tejapai nengah mayuh bengkah projek pemansang deka dipejalai.

“Sida dia diatu udah bulih mayuh macham projek baka nyeleti sekula SK Perpat, nerima bekal ai beresi enggau kuasa karan kelimpah jalai alun ke nyadi jalai penyambung ngagai selampur Saratok enggau menua bukai.

“Nengah semua projek tu, kitai deka ulih nyelinting pemansang ekonomi kelebih agi pengawa betanam betupi,” terang iya.

Ali mansutka jaku tu ba pengawa bejadika blok baru Sekula Primari (SK) Perpat ditu, kemari.

Ku iya, Kampung Perpat entara genturung pendiau apin datai jalai nengah darat tang semina dilawa nengah jalai ai ngelayang Batang Krian.

Taja pia ku Ali, sida ba menua tu benasip amat laban bisi dandang tanah chukup manah endur bekebun.

“Anang enggai ngelawa, betanya sereta berandau enggau pemesai ba ejensi enggau opis perintah ngambika nemu chara minta bantu ke bisi disediaka perintah.”

“Ambika chunto, kitai bisi IADA, MPOB enggau Opis Betanam Betupi ti nyendiaka mayuh macham bantu enggau kus ungkup kita ngemansangka pengawa betanam betupi,” ku Ali meransang.

Ngelansa pasal pengawa sehari nya, Ali madahka diri lantang ati meda blok begunan baru SK Perpat udah tembu digaga nitihka timpuh.

Ungkup penerang, SK Perpat bisi 152 nembiak nerima tiga blok baru nyengkaum siti blok buding beungkus RM2.5 juta.

Berebak enggau nya, Ali mega bisi nyuaka belanja penyampau RM20,000 ngagai Serakup Apai Indai enggau Pengajar (PIBG) SK Perpat dikena sida bejalaika aktiviti ti udah dilanggur.

Sama datai Pengari Opis Pelajar Saratok Mohamad Tarmimi Ali, Kepala Pengajar SK Perpat Missis Aris, Kaban Kaunsil Pelilih Saratok Jiden Morshidi, Chairman PIBG SK Perpat Pandi Abidin enggau bala ketuai raban bansa bukai.

Suara Sarawak