KUCHING: Opis Menteri Pelajar Malaysia (KPM) meri bantu RM100 Juta dikena ngatur pemansang ke baru ba 34 buah sekula ba Sarawak.
Sapit Menteri Pelajar Malaysia Teo Nie Ching, bantu ari KPM baruh Projek Ngaga Baru enggau Ngemanah Sekula Repuk di Sarawak ngambika likun baka sekula ti tau ngenataika penusah enda disadang.
“Projek Sekula Seranta Sarawak dikena ngemanahka sekula enggau ngaga begunan ti likun ngambika nembiak ulih belajar enggau likun sereta lantang.”
“Reti repuk iya nya begunan ti dipadahka Pemesai Kereja Raya (JKR) begunan ti enda likun lalu ba ‘skala’ tujuh patut diganti enggau lengkas” ku iya.
Iya madah munyi nya ba sidang media ti diatur sepengudah Program Penemuai ngagai Sekula Primari (SK) Sebandi Matang, kemari.
Iya nambah, SK Sebandi Matang siti sekula ti dipilih entara 34 sekula ke patut dikemanah.
“Projek ti deka dipejalaika ba skula tu ngena enam bilik kelas enggau empat jamban lelaki sereta empat jamban ungkup indu.
“Projek ungkup sekula tu nyengkaum RM2 Juta kus syiling ti deka diatur piak Opis Kereja Raya (JKR) enggau tender tebuka ngagai bala kontraktor ujung bulan April tu” ku iya.
Projek tu deka dipejalaika ngena sistem kontraktor industri (IBS) lalu dipelaba tembu ujung taun tu.
Statistik sekula seranta ke diatu ba Sarawak dipeda nengah skala lima sampai tujuh sepenyampau 207 buah iya nya sekula primari enggau sekondari, tu nunjukka begunan ti enda likun bisi dipadahka JKR enggai Opis Pelajar Nengeri (JPN) Sarawak agi nganti bantu dikena ngemujurka projek ba sekula nya.
Sama nyereta penemuai tu iya nya Sapit Direktor Pelajar Nengeri Sarawak Abang Mat Ali Abang Masagus, Kaban Parlimen Kuching Dr. Kelvin Yii Lee Wuen, ADUN Pending Violet Yong, Ketuai Sektor Pengatur Pengawa Sekula JPN Sarawak, Pemesai Pelajar Pelilih Samarahan Hohadi Mobin, pengari Picific Partnership 2019 Engineers Ensen (Ensign) Harms (US NAVY), Raban Soldadu Malaysia Kolonel John Sembilan enggau pengari ti bukai.
