KRT – Ngempung kaul serakup pupu bansa

SIBU: Kawasan Rukun Tetangga (KRT) tu ukai pelasar politik tang sebengkah komiti ti menggi pangku pengawa beguna amat ngempung kaul serakup komuniti.

Pemesai Penyerakup Bagi Menua Sibu Siti Nurfatimah Hussen nyemetak madah, KRT bejalaika program bepelasarka pekara tauka penanggul ditapi peranak menua nya.

“Kelimpah ari nya, KRT mega ngatur program ti udah sedia bisi dikena nerenak, ngenegapka penyerakup, semengat begulai bebaik, bebakih sereta nyungkak tikas idup enggau pengelantang rama dia.

“Nengah KRT, kitai mega ngarapka sida ulih ngiga belanja tambah ari macham chara enggau pelasar ngambika KRT seruran chakah gawaka komuniti,” ku iya nerang.

Iya mansutka jaku nya lebuh bejaku ba Pengawa Ngelanchar KRT Tanjung Penasu enggau Ngerami Kaul Serakup Nyerumba Hari Gawai 2019 di Dewan Sekula Primari (SK) Tanjung Penasu apin lama ke udah.

LANCHAR…Oscar (dua kiba) ngelanchar KRT Tanjung Penasu seraya dikemata Siti Nurfatimah (kiba), Winston (tiga kanan) sereta bala bukai.

Pengerami nerima penatai lebih 200 iku pengabang udah dipenyadi Kaban Parlimen Sibu Oscar Ling Chai Yew disempulang Chairman KRT Tanjung Penasu, Winston Suji.

Kenu ku Siti Nurfatimah, KRT Tanjung Penasu nyadi KRT ke-94 di Bagi Menua Sibu ke alai pengawa numbuhka iya baru udah dikemendarka Ketuai Direktor Penyerakup kena 7 September 2018.

“Penyampau KRT nyentuk diatu bisi 94 buah, mungkur 53 KRT Pelilih Sibu, 36 buah KRT di Pelilih Kanowit enggau lima buah di Pelilih Selangau,” ku iya ngelansa.

Seraya Oscar ba jaku dipansutka iya minta mensia mayuh patut temegah enggau penyelai dikembuan menua tu ti diuwan pupu bansa, gaya idup enggau pengarap.

Bida penemu politik ku iya, patut diteju lalu pemereti ati patut dijapai pulaika pemaik enggau penegap kaul serakup sereta pengelantang raban bansa.

Pengerami richah enggau ajat ari Jiran Muda, poco-poco ari Jiran Wanita, belagu enggau chabut tikit benasit.

DILALU NGENA BASA…Penatai Oscar (empat kiba) disambut Siti Nurfatimah (lima kiba) enggau Winston (tiga kiba) lebuh datai ba SK Tanjung Penasu.