KUCHING: Nguasa Jaku English patut dipungkal ari renggat pra sekula, ku Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Fatimah Abdullah.
Berebak enggau nya ku Fatimah, nembiak mit patut diajar Jaku English kenyau ari pra sekula.
“Enti diperati ba pra sekula, bisi dua bengkah batang jaku diajar, Jaku Melayu enggau Jaku English.
“Pelajar tu deka ngemuntangka nembiak mit nya empu kelebih agi maya sida tama ngagai sekula primari,” ku Fatimah.
Ambika chunto ku Fatimah, tebal agi nembiak mit ba menua pesisir besekula ba Sekula Primari Bansa Cina (SJKC) dibanding enggau nembiak bansa China empu.
Taja pia ku iya, ari sukut pengelandik ba Jaku Mandarin, tikas penyulut ti ditunjuk enda entu ngemantupka ati lalu nya meri empas ngagai penyulut ba subjek bukai.
“Aku bisi madah ngagai raban kaunsil sekula, enti ulih numbuh mayuh agi pra sekula Jaku Mandarin ba menua pesisir.
“Nengah tu, sida ulih nelebaka diri enggau Jaku Mandarin maya sida tama ngagai sekula primari,” ku iya.
Sebedau tu, bisi bengkel ti mantu bala pengajar pra sekula nguasa pengelandik chara nerenakka Jaku English ba siku-siku nembiak mit, ku Fatimah.
“Pekara tu seriris enggau pemerat sereta kuing BPAKK meransang penempa anak mit ti menyana enggau sebela ba rampa ti likun, meruan enggau tegap.”
