Kuching, Miri enggau Sibu bela ngerikod siti kes pemati

KUCHING: Sarawak ngerikod tiga kes pemati ke alai bela siku di Kuching, Miri enggau Sibu ngujungka kes pemati nambah ngagai 42 kes.

Sekretariat Komiti Penyangga Penusah Nengeri Sarawak (JPBNS) madahka Sarawak ngerikod 148 kes positif Covid-19 ke alai 48 kes di Sibu, bela 15 kes di Bintulu enggau Dalat, 14 kes di Beluru, 12 kes di Miri, bela lapan kes di Kapit enggau Kanowit.

Pia mega, bela tujuh kes di Sebauh enggau Song, lima kes di Sri Aman, tiga kes di Bau sereta bela siti kes di Kuching, Lundu, Tatau, Subis, Selangau enggau Sarikei ngujungka kes nambah ngagai 4,824 kes.

Bekaul kes pemati, kes pemati ke-40 nya kes ke-2,82 ngaul siku lelaki peranak menua beumur 40 taun ti udah beperesa RT-PCR di klinik pengerai kena 17 Januari tu tadi.

Niang beperesa pengerai laban bisi kelai pedis rekung enggau nadai ensium utai kelimpah iya ditemu positif enggau pedis dada sereta pedis enseput.

Lelaki tu enda ngeleda enggau ditukuka bebadi nyawa kena 1 Februari tu tadi kelimpah bisi sakit jantung enggau sejarah kala masuk sepital ba taun 2020, tinggi darah enggau dislipidemia.

Pia mega, kes pemati ke 41 nya kes ke-3,770 ngaul siku indu peranak menua beumur 59 taun udah dipasuk ke Sepital Miri laban kimoterapi penyakit riman sel darah burak.

Indu tu mega bisi kelai tabin enggau jantung dedegup laju berapa hari ke udah pengudah pulai berubat nya.

Iya ditemu positif Covid-19 pengudah beperesa RT-PCR lalu ditukuka bebadi nyawa kena 2 Februari tu tadi kelimpah bisi penyakit Hepatitis B.

Nambahka nya, kes pemati ke-42 nya kes ke-2,584 ngaul siku indu peranak menua beumur 74 taun diperubat ba Sepital sibu pengudah meresa kontak semak ngena RT-PCR lalu ditemu positif.

Iya ditukuka bebadi nyawa kena 3 Februari tu tadi enggau iya gegaring sakit kenyau ari 10 taun ke udah kelimpah bisi penyakit cerebrovascular enggau dementia.

Suara Sarawak