Kunchi pengelantang rumah tangga

Nemu ngaku penyalah sereta berani minta ampun ngagai pangan diri

KUCHING: Ulah nemu ngaku penyalah sereta berani minta ampun enggau pangan diri empu ulih nyadi kunchi pengelantang dalam rumah tangga.

Regional Co-ordinator Kus Tikah Apai Indai ari Alpha Malaysia pampang Sarawak Dr Wong Howe Tung madah ngenang jasa laki tauka bini patut bisi ba ruang bilik.

“Rumah tangga patut dilindung pengudah ngaga sumpah deka jadi melaki bini.

“Nya alai, Kus Tikah tauka ‘The Marriage Courses, How To Build A Long Lasting Relationship’ ti dipelanja Perintah Sarawak patut diteruska awak meri pengelantang ngagai ruang bilik,” ku iya.

Wong madah pekara nya Pengerami Graduasyen ‘The Marriage Courses, How To Build A Long Lasting Relationship’ ba Sarawak Club ditu, ensanus.

BEGULAI MANAH…Datuk Sri Fatimah Abdullah (tiga kiba) nyuaka setipikit ngagai siku peyereta seraya dikemataka Dr Wong Howe Tung (kiba) enggau balat bukai

Kelimpah ari nya, iya ngarapka kus tikah ti digaga tu tetap nerima sukung ari gerija, gerempung bekaul enggau mensia mayuh ngambika nemu guna kaul idup melaki bini kemaya hari.

“Laki enggau bini patut ngatur aktiviti paling nadai sekali seminggu dikena ngerapatka kaul enggau pangan diri.

“Pia mega , sida patut bebasaka pangan diri ngambi meri teladan ti manah ngagai bala anak,” ku iya.

Nangkan nya, Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Sri Fatimah Abdullah madah pengawa bebasaka pangan diri patut bisi ba orang indu tauka lelaki.

“Nadai rumah tangga ti enda kala besengki jaku, indah lidah ulih tegigit tu ke nyadi lalau rayat kitai mensia.

“Sida ti lelaki ngasai diri deka dipebasa bini laban nyadi ketuai rumah tang sida mega patut bebasa ka bini,” ku iya.

Iya nandu, sukung enggau tanggungpengawa entara laki bini amat beguna ba pengelantang rumah tangga.

Suara Sarawak