Besaup Ngiga Pemansang
SRI AMAN: Raban Gerempung Indu Dayak Sri Aman (GIDSA) mujur ngulu Kus Fertigasyen Chabi kena Hari Enam tu tadi.
Kenu ku Chairman GIDSA, Bonie Langkop, setipak enggau rambai jaku ti nyadi lalau kuing pejalai gerempung nya, Besaup Ngiga Pemansang, sida ngena peluang nya ngemansangka diri ba pengawa betanam chabi ngena chara moden agi, fertigasyen.
“Ari penerang dikenataika pengelicha rambau kus nya, fertigasyen tu chara ngesum utai tanam ngena sistem nanjah ngena beris ai.
“Ba sistem tu, ai sum disambung ngagai sistem ti meruan lalu asil utai tanam tauka chabi deka nambah 80 ngagai 90 peratus,” ku Bonie.
Nengah chara tu mega ku Bonie, sistem nanam mega nadai begunaka tanah tang semina begunaka sum bansa belai.
Sistem tu mega ngajar kitai mayuh bansa kereja baka ngiga peluang dagang enggau makit chabit sereta beratika peminta makit kemaya hari nyengkaum makit luar.
“Mayuh amat penemu baru diiri bala kami ti ngulu kus ke diatur sehari nyentuk di Kompleks Lumba Sri Aman ditu.
“Betanam chara moden ukai semina ulih ngelimat jam enggau tubuh orang gawa, tang mega ngemuntangka pengawa kitai, nadai mayuh kelikuh ngintu iya.
“Taja begunaka puku besai kelebih agi terubah berimbaka tanah baka pengawa nyungkur bukit, ngaga bakut, nganchau kambut planstik kena ngebap bakut, nyambung paip pvc enggau pengawa bukai,” ku Bonie madah silik.
Nya alai ku Bonie, sida sebuat enggai masau peluang ke bisi dikena nambah enggau ngiri penemu baru ngagai bala kaban gerempung nentuka ulih nyingkang mansang baka orang bukai kelebih agi ngaul pengawa betanam betupi.
