KUCHING: Lagu ‘Biar Mati Ditangan Sulu’ ti disada penanyi asal niang Micheal Jemat mai tuah ngagai Tim The Fingerprints lebuh dipadu nyadi champion Kuching Waterfront Jazz Festival (KWJF) renggat kepenudi ensanus.
Ku vokalis The Fingerprints Alisa Spencer enggau Hazel Melville lagu ‘Biar Mati Ditangan Sulu’ diubah nitihka rentak jazz ari penanyi asal kelimpah diapit sebuah lagu Melayu enggau English.
The Fingerprints mujur mai pulai perais mata duit RM1,500 lalu deka ngambi bagi merindang bala mensia mayuh ba KWJF kena 27 enggau 29 September tu ila di Waterfront Kuching-Grand Margherita.
Penuduk lumur dua enggau tiga dipenggi Tim Sang Timur enggau Jazznova mai pulai perais mata duit RM1,000 enggau RM700.
Penuduk lumur empat Tim Sl2J enda pulai jari puang laban bisi mega nerima saguhati RM300 ba renggat kepenudi pekit ti diatur ba Hotel Grand Margherita ditu, ensanus.
Komiti pengatur KWJF ti mega Mandal Direktor Besai Opis Pemansang Ekonomi Sarawak (SEDC) Edwin Abit madah pekit tu digaga ngambika ulih ngangkat penau nembiak baru enggau lama dalam muzik jazz.
“KWJF taun tu deka disereta bintang besai nyengkaum penanyi tebilang ari Malaysia Ning Baizura, Harvey Malaihollo (Indonesia), Sitti Navarro (Filipina), Dave Brewer and The Doodaddles (Australia), Dawn Wong and The Shanghai Jazz Club (Singapura) enggau mayuh agi.
“Mega deka diatur pagi ila (kemari) Road Show tauka atur pengawa bejadi KWJF 2019 di Miri dikena ngelakuka pengerami tu,” ku iya lebuh ditanya pemberita.
Tambah iya, kekeempat tim ti bepekit malam nya udah mantaika asil penau ti amat manah sereta meruan agi ari renggat kedulu.
“Kitai udah milih champion lalu sida deka ngarika tim ari Sarawak ngambi bagi mantaika muzik jazz ba panggau besai di KWJF tu ila.
“Kami ngarapka sida ngena peluang tu awakka kitai ulih mantaika penemu sereta peneleba ti lebih besai ngagai nyentuk ngagai tikas entarabansa,” ku iya.
Nangkan nya, iya sekali agi ngarapka mensia mayuh kelebih agi sida ti rinduka muzik jazz sama datai meri sukung lebuh pengerami tu dipejalaika ila.
“Disadang mayuh agi sida deka datai ari taun ti udah, lalu deka disereta enggau mayuh aktiviti bukai baka mandangka asil pengelandik jari.
“Kami ngarapka pengerami tu ila deka nyadi kenang sida ti datai meda,” ku iya.
Sapa bisi ati deka nemu enggau silik pasal pengerami tu tau ngelawa www.kuchingwaterfrontjazz.com tauka betelefon nuju lumur 082 555189 (Palace Borneo Sdn Bhd).
Tikit meda pengerami tau mega ulih dibeli ba online tauka dibeli ba Hotel Grand Margherita.
