SYLVESTER RIANG
Suarasarawak.news@gmail.com

PENANYI sigat asal Sebauh Setulai, Albert Edward empai lama mujur ngeluarka lagu pemadu baru iya ti pejuluk Orang Ketiga.

Lagu sinu nya dikeluarka nengah pelasar YouTube Panggau Buluh Pengerindu (BBP) kena 24 Oktober tu tadi.

Urung seminggu udah dikeluarka, lagu nya dipeda ba penyuah lebih 4,000 kali enggau nerima timbal manah ari mensia mayuh.

ORANG KETIGA
Semina macha pejuluk lagu nya aja kitai udah nemu baka ni jalai cherita tauka kisah dalam lagu nya ti bendar.

Enti disebutka ‘orang ketiga’, udah tentu nya ngenang siti kaul pengerindu ti benung kusi enggau udah lenyau pemanis.

Nya mih pekara ti balat dikenangi enggau dikenakutka semua orang ti jadi melaki bini tauka sida ti benung nanggam pengerindu.

Nerang lenak agi, Albert Edward madah, lagu nya ngenang siku lelaki ti dilengkaka sulu ati iya ketegal orang ketiga.

Iya madah, suba seduai bela keran enggau sayau ke pangan diri lalu betaun-taun nanggam pengerindu enggau ati lurus.

“Tang enda nyangka, sekali biau balai datai mangka, pengerindu indu nya bebali tekala nya.

“Ketegal lelaki bukai ti beduit enggau bereta, indu nya kempang amat ninggalka sulu ati iya pia aja nyau tekapa-kapa.

“Lelaki nya betanya-tanya, dini semaya seduai ngelama tu ti deka idup sekunsi begulai sama?

“Ni danji seduai ti deka bekunsi pemerinsa enggau pengelantang nyentuk ke tuai?

“Semua nya semina danji bula ti manis ba mulut aja. Lelaki nya lebu!

“Kempang amat ati indu nya ngayah enggau menyati ati lelaki nya,” terang Albert Edward.

Taja pen chukup berat deka ngelengka enggau nerima pekara ti nyadi, ku iya, tang ba ati lelaki nya pemadu dalam, iya enda ulih nipu ati diri, iya agi sayau ke indu nya lalu ngarapka indu nya pulai baru.

Iya madah, ati lelaki nya balat anchur, lebu, nadai daya, sinu enggau ngeransi ngenang pengerindu tuchi iya bangat dipenyati baka nya.

Ku iya nyemetak, kisah dalam lagu nya nadai mangki pengidup iya tang nya diangkat ari kisah idup ti kala diasai ke mayuh orang.

“Aku semina ngangkatka kisah sida nyadi inspirasyen ba pengawa ngasilka siti lagu ti lurus enggau besai reti sereta mai empas emosyen ti besai ngagai bala peninga,” tampung iya.

ANANG SARU
Ku artis beumur 28 taun nya, pesan ti dikenataika iya nengah lagu Orang Ketiga iya nya enda semua pengerindu nya manis laban kekadang pengerindu nya datai ba jam ti salah ngagai orang ti salah.

Iya madah, semua orang ulih labuh pengerindu tang semina mimit aja ti milih beretan enggau taluk nyaga pengerindu tuchi.

Nya, ku iya, bepanggai ba pengelurus ati budi kitai empu lalu ukai ari pejal tauka umbuk orang bukai.

“Pengerindu enda ulih dikemula laban pengelurus kitai sayau ke pangan diri nya ulih dipeda ari ulah enggau timbal ti dipandangka kitai.

“Nya alai, nyema nuan tetemu ke orang ti beamat-amat sayau enggau sanggup nerima pengurang penimpang nuan, terima mih iya enggau ati lurus.

“Anang ngayahka tudah ketegal orang bukai! Bedau temu orang bukai mentas enggau ulih nerima pengurang penimpang nuan baka iya.

“Suah amat kitai ngumbai orang ketiga tu jai ketegal ngerampas utai orang.

“Tang kekadang sida telanjur sayau ngagai orang ti salah ba jam ti salah lalu situasyen nya ukai dipilih iya empu.

“Kekadang sekeda orang madah ke diri nadai orang ngempu taja pen kebendar udah bisi sulu lalu nya mih ti ngasuh tudah tepekul ba siti situasyen ukai niat deka nyadi orang ketiga,” ku lalau Alberd Edward.

Iya madah, lagu nya mai kitai mereti ke genap ati ti telih nya ngembuan cherita enggau sebana kediri empu ti patut didinga.

NEGU ATI
Pekara ti narit ati ba lagu Orang Ketiga iya nya genap leka lagu nya ngundan tegu emosyen ti besai.

Nya mandangka pekara ti suah nyadi ngelingi kitai – kekadang pengerindu nya datai ba maya ti salah enggau ba orang ti salah lalu ukai dipinta enggau dikedeka.

Pia mega, tiun lagu ti lembut enggau berentak joget nya ngundan emosyen enggau pengasai kediri empu.

Ku tusui Albert Edward, genap kali iya nyadaka lagu nya, enda nyalah asai ti iya dibai tama ngagai kisah nya.

Iya pechaya mayuh peninga ulih ngaitka kisah dalam lagu nya enggau kisah ti kala diasai ke sida empu.

“Lebuh aku nyadaka lagu tu, aku nguji ngidupka watak dalam lagu tu, aku ukai semina belagu tang ngenataika kisah siku orang ti dikepit entara sayau enggau penaluk.

“Aku deka bala peninga ukai semina mendingka lagu tu aja tang bela ngasaika konflik emosyen ba genap leka lagu tu,” terang iya.

Timbal mensia mayuh ngagai lagu nya, ku iya, chukup ngemantupka ati lalu mayuh sida muji lagu nya chukup negu ati sida laban penuh enggau emosyen.

Iya madah, bisi sekeda orang ti mendingka lagu nya nyau tekenang ke kisah sida empu ti kala ditinggal pegi ketegal orang ketiga.

“Tu mih ti ngasuh lagu tu ukai semina lagu aja tang nyadaka sebana ati,” tandu iya.

PEJALAI MERINDANG
Pejalai Albert Edward ba dunya pemerindang bepun ba taun 2017 pengudah masuk siti pekit belagu.

Keterubah suba, iya semina deka bekunsi pengerindu enggau penau diri ba pengawa nya tang bela nerima sukut tegut ari sida sebilik, bala bakih enggau komuniti Dayak.

Nya ngujungka iya ngaga pemutus berani ngujika nasip diri ba dunya pemerindang Dayak lalu mujur beretan nyentuk diatu.

Ari nya, iya belajar ke mayuh pekara nyengkaum chara ngerikod lagu, merindang ba atas panggau nyentuk chara ngenataika emosyen nengah lagu.

Genap singkang mit ba dunya pemerindang nya chukup besai reti ba iya.

Naka diatu, Albert Edward mujur ngeluarka lapan iti lagu nyengkaum Gaga Ati Bekelala, Ngelebu Pengerindu, Ingat Asal Penatai, Tegepang Dalam Ati, Joget Nuchung Ngenung, Nuan Ka Lawa-Lawa, Belulu Ujung Minggu lalu pemadu baru iya nya Orang Ketiga.

Sekumbang mekuh dunya pemerindang, mayuh kenang manis enggau pait kala diasai ke iya tang nya mih pait manis nyadi pemerindang.

Sekeda kenang manis ti kala diasai ke iya lebuh lagu iya diterima enggau lekat ba ati bala peninga kelebih agi lebuh sida semenua munyi pemanah sada nyawa iya belagu.

Albert Edward madah, nya siti pengasai ti chukup ngemegah enggau besai reti ba iya.

Kekadang, ku iya, bisi maya ngasai kediri berasai dikelaung, kurang diaku enggau enda dikeibuh pengudah bebendar ngasilka lagu.

Taja pia, iya ngaku, semua nya ngajar iya liat ati enggau lurus ati ngasilka lagu.

Pengerindu iya ba pengawa belagu endang dikembuan iya kenyau ari mit nyentuk ke iya suah masuk mayuh pekit belagu lebuh agi besekula suba.

Ku iya, sida sebilik bela bekunsi pengerindu belagu tang semina iya aja ti tepejuh ba dunya pemerindang.

Penau artis veteran Wilson Empeni ti tebilang enggau lagu Bisi Peluang Nuan Aku Undang ngetan identiti Dayak ba genap lagu iya meri inspirasyen ngagai Albert Edward.

MERI INSPIRASYEN
Anak tuai ari 13 iku diri menyadi nya madah ke diri deka terus ngasilka mayuh agi lagu bekualiti lalu ukai semina nyadi pemerindang aja tang meri inspirasyen ngagai orang bukai, industri enggau komuniti.

Iya mega ngarapka lagu enggau penatai iya ba industri tu majak diaku enggau diterima semua orang.

Industri muzik Dayak, ku iya, majak angkat nunda singkang muzik menua luar nipak ke pemansang teknologi kemaya hari sereta terus ngelakuka identiti lokal.

Sebedau ngujungka randau, Albert Edward meri terima kasih ngagai semua orang ti nyukung pejalai iya ba dunya pemerindang kenyau ari suba nyentuk sehari tu.

“Sukung ari kita meri peransang ngagai aku terus ngeluarka lagu, terima kasih mayuh-mayuh!

“Enti nadai nadai sukung ari kitai, sapa mih aku lalu aku pen enda ulih manggai ba tikas baka diatu.

“Nya alai, aku ngarap kita terus meri sukung tegu tba genap singkang aku ba industri tu,” ku iya nutup randau.