Laki malu bini ribat, ringat enda diberi

MIRI: Ringat enda diberi RM200, siku lelaki kempang malu bini iya ti benung ribat nyentukka bedarah di Kuala Baram, ditu ensana.

Penusah nya nyadi urung pukul 4 lemai, indu beumur 38 taun udah dipalu laki iya ngena jari enggau penyapu lebuh enggai meri duit RM200.

Nitihka penerang, indu nya enggai meri duit ti dipinta laban deka dikena masuk sepital maya beranak.

Ketegal peminta ditulak, saspek ti gawa mekanik ba sebuah kilang malu bini iya ti ribat nya.

Hari ti sama pukul 9 malam, indu nya nganjung mesej ngagai adi ipar iya pasal pekara nya seraya madah bisi bakal ba mua, kaki enggau bedarah.

Ipar biak iya ngaga ripot kes tu ba balai polis ngambi dipansik silik, ditu kemari.

Indu nya diatu diripotka udah diperubat ba Sepital Besai Miri.

BAKAL… Indu nya bakal ba kaki kanan ketegal dipalu laki iya.