KUCHING: Langkar renggat keterubah projek mutar bah (flood mitigation) beungkus RM20 juta di Batu Kawa udah tembu digaga.
Sapit Premier Sarawak, Datuk Amar Dr Sim Kui Hian, madah pengudah pengawa ngaku Opis Tanah enggau Survei (JTS) dikemendar, tinda projek nya deka dibuka.
“Aku baru udah berandau enggau Douglas (Sapit Premier Sarawak, Datuk Amar Douglas Uggah Embas) sereta Opis Parit enggau Entali Ai (DID) tadi (ensanus).
“Renggat keterubah beungkus RM20 juta udah tembu dilangkar, lalu pengudah pengawa ngaku JTS dikemendar, tinda deka dibuka,” terang iya.
Dr Sim bejaku munyi nya lebuh ditanya Suara Sarawak nengah pesan WhatsApp ditu, ensanus.
Kaban Kunsil Nengeri (ADUN) Batu Kawa nya madah baru, renggat kedua beungkus RM44 juta ke mega belanja tambah ti nadai dalam pelin asal udah dikemendar Premier Sarawak, Datuk Patinggi Tan Sri Abang Johari Tun Openg, ba taun siti nyin tadi.
Sitak Batu Kawa, kelebih agi genturung Desa Wira, entara sekeda genturung menua ke suah ampuh bah lebuh musin pengujan ba ujung taun tauka pun taun ke suah agi dikumbai musin landas.
Sebedau tu, media ngeripotka Perintah Sarawak deka ngaga sebuah pegung ngandang ai beungkus RM64 juta nyadi palan nimbun ai ujan dikena mutar penanggul suah bah timpuh panjai ba Kampung Sinar Budi, Taman Desa Wira enggau genturung besemak.






