Lantang ati bisi rumah

KOTA SAMARAHAN: Pengeliat ati siku mandur kereja kunterik nganti bulih rumah ngelama tu tepantup pengudah nerima kunchi rumah iya pagi tadi.

Haikal Halim Abdullah, 52 taun, entara 180 penama ti bulih rumah ba PPR Samarahan ll.

“Aku diatu gawa nyadi mandur ba sebuah serikat berumah di Batu 4 lalu nyuwa rumah di Batu Gong Siburan.

“Sepuluh taun udah nganti lalu diatu aku berasai lantang amat nerima kunchi rumah lalu enda lama agi kami sebilik deka pindah kitu,” ku iya ti bisi dua iku anak agi sekula.

Haikal mansutka jaku nya lebuh ditanya pemberita ba pengawa nyuaka ‘replika’ kunchi rumah ba PPR Samarahan ll ditu.

Haikal Halim Abdullah

Ku Haikal, datai ba umur diatu enti minta jali ari bank dikena meli rumah ukai pengawa ti muntang laban bank mar deka meri pinjau ngagai orang ti udah lunggar umur.

Kelimpah ari nya, Liew Chin Sian, 45 taun mega madahka diri lantang ati laban diatu udah bisi rumah kediri empu.

“Ngelama tu aku diau ba pengkalan feri tanah perintah laban aku kereja nyadi mandur feri lalu udah nganjung peminta rumah tu kenyau ari taun 2015.

“Sehari tu (kemari) berasai lantang amat laban udah bisi rumah kediri, endur kami sebilik baka bini enggau tiga iku anak ngenduh,” ku iya.

Nangkan nya siku peranak India Satish A/L Toulsimani, 27 taun madah pengudah bisi rumah kediri iya enda kiruh numpang rumah apai enggau indai di Matang agi.

Liew Chin Sian

“Ngelama tu kami sebilik (bini enggau dua iku anak) diau ba rumah apai enggau indai aku di Matang din.

“Udah tu, kami sebilik ulih ngenduh ba rumah diri empu. Tambah mega genturung pendiau tu semak enggau endur aku gawa,” ku iya nerang.

Ba penemu Nasbi Adong, 35 taun, asal ari Sematan madahka pengudah nganti lima taun, pengawa sehari tu endang ngasuh ati iya lantang.

“Aku udah bebini lalu bisi dua anak agi besekula berasai lantang laban ulih ngempu rumah kediri ti nyadi juluk ati semua orang.

“Taja diatu aku diau ba rumah perintah (kuartes), pengingin ati ngempu rumah kediri tu endang udah lama tang lebuh deka nyali ba bank meli rumah puntan belama ketegal gaji aku mit,” ku iya.

Nasbi madah perengka guna ti disikap ba rumah nya pan manah laban bisi surau, tadika enggau endur nembiak mit bemain.

“Kitai mega enda nangika sekula jauh laban ditu bisi tadika disedia ungkup nembiak mit besekula,” ku iya.

Satish A/L Toulsimani

 

Nasbi Adong