Lapan CPPC ditumbuh nangkup peminta makit eksport

KUCHING: Lapan endur selampur nengeri deka dikemansang enggau Palan Ngumpul, Nginjin enggau Nungkus (CPPC).

Menteri Muda Betanam Betupi, Dr Abdul Rahman Ismail madah Perintah Sarawak nengah Opis Menteri Betanam Betupi Moden, Tanah Adat enggau Pemansang Kandang Menua deka ngemansangka CPPC tu di menua Tarat di Bagi Menua Serian, Layar enggau Spaoh (Betong), Lawas, Limbang, Sadong Jaya (Samarahan), Long Lama (Miri) enggau Sungai Baji (Sarikei).

“CPPC di Tarat benung digaga seraya endur bukai datai ba renggat surat tinda.

“Tu nyadi sebagi ari palan disikap ngena infrastruktur bejalaika aktiviti ngumpul, nginjin enggau nungkus ngambi ulih mansutka asil produk nangkup peminta makit eksport,” ku iya.

Iya mansutka jaku tu lebuh nyaut tanya Adun Bukit Begunan Datuk Mong Dagang rambau Aum Kaunsil Nengeri (Dun) hari kedua, tadi.

Dr Abdul Rahman Ismail

CPPC benung bejalaika operasyen di baruh kompeni peribit ti bepeneleba enggau udah bisi kaul ba makit diatu.

“CPPC ngena chara meli asil tanam ari kandang menua nya lalu digumpul lalu semua pengawa tu belalauka pekara udah ditetap enggau penyampau ti udah dikemendar.

“Tu nipakka kuing tuju perintah nengeri merambu aktiviti mansutka asil betanam ari peminta makit,” ku iya.

Bisi empat batang pekara patut bisi enggau diperati sebedau palan CPC ditumbuh.

Pekara keterubah iya nya enda tau enda bisi pengawa masutka asil betanam ti bepengulih besai ba makit ke bisi diatu.

“Kedua, asil dipansut agi kurang patut bisi pansik dulu dipejalai lalu enti bisi tanah, tau dikemansang sereta bala pekebun sedia berimbaka tanah sida empu.

“Ketiga, kompeni besai patut nyendia diri nyadi operator CPPC sereta sida sedia nyadi orang ke meli ngena rega ke udah ditetap, lalu keempat, palan nya patut ditumbuh ba endur strategik,” ku iya madah nyemetak.

Pia mega ku Abdul Rahman, perintah sedia berundingka pengawa numbuhka CPPC di sitak Bukit Begunan seraya penyampau belanja ditaga RM500,00 ngagai RM10 juta.