BINTULU: Lapan iku datai ari tiga ruang bilik mujur diselamat pengudah tepekul ketegal ampuh bah ba Sekula Primari (SK) Kampung Nyalau, Bintulu, pagi kemari.
Ku Pengari Balai Bomba enggau Penyah Penusah (BBP) Samalaju, kangau diterima urung pukul 8.34 pagi, lalu raban ngesah datai dia urung 08.46 pagi.
“Operasyen betuai ke Tuai Balai, PPgB Irwin Abidin, disaup enam staf bukai ngena siti entukar FRT, siti pikap enggau siti perau aluminium,” ku iya ba penerang, kemari.
Iya madah, bala ti diselamat nya tiga lelaki besai tuai, tiga indu besai tuai enggau dua nembiak mit lelaki. Semua sida nya ku iya udah dibai ngagai rumah kaban belayan ti semak nentuka pengelikun sida.
Iya mega ngelalau mensia mayuh seruran bejaga laban tikas ai seruran berubah lalu ngasi ke jaku tangkan raban bekuasa.
Palan Ngatur Operasyen Sarawak deka terus madah belama penerang bekaul operasyen nya. SYAMIMI HUSNA
