Lebih 170 lumpung batang berega RM34,000 dirampas

BINTULU: Raban Polis Marin (PPM) Wilayah 5 Bintulu ngerampas lebih 170 lumpung batang macham bansa enggau pemesai dipelaba berega RM34,000 dalam Op Landai kandang kampung Sekula Primari (SK) Pelagau, Tatau- Selangau kena Hari Satu tu tadi.

Nitihka penerang, tugung lumpung batang nya ditemu siku pemesai kaban enggau tiga kaban PPM Wilayah 5 Bintulu urung pukul 8.30 pagi.

Pansik silik nadai tetemuka sebarang kelai hak ngempu enggau kelai chukai ba lumpung batang nya lalu dipelaba ditebang chara belalai enggau nadai pemendar ari Opis Kampung Sarawak.

Ripot polis pasal lumpung batang dirampas udah digaga ba Opis Polis Selangau lalu kes diserah ngagai Opis Kampung Sarawak Bagi Menua Sibu ngambika atur bukai ulih dipejalai.

Berebak enggau nya, Raban Polis Marin minta kerejasama mensia mayuh ngeripot ngagai PMM tauka sebarang opis polis besemak enti bisi sebarang penerang pasal pengawa betebangka kayu kampung enggau berangkutka lumpung batang chara belalai.

Udah nyadi tanggungpengawa kitai nagang enggau ngemunaska penyalah nebang kayu chara belalai enggau nadai pemendar.

Pansik silik deka dipejalai dikena nyidi orang ti betebangka kayu chara belalai nya ngambika sida ti ngereja penyalah diukum.

DIRAMPAS… Raban Polis Marin nunjukka lumpung batang dirampas sida.