KUCHING: Lebih 200 iti lagu ti dikeluarka di baruh perabung Kaban Music Production (KMP) Sdn Bhd mujur direjister di baruh Music Right Sarawak Berhad (MRSB).
Pemungkal KMP Sdn Bhd, Gibson Richard madah, lagu ti direjister nya berengkah digaga ari taun 2016 nyentuk 2024 iya nya urung lapan taun ti udah.
“Aku endang meransang bala penanyi, penengkebang leka lagu, penebah perengka muzik enggau bala bukai ti di baruh KMP ngerejister diri ba MRSB ngambi sida bela bulih royalti kelimpah dikena nyaga lagu sida.
“Nya alai, naka diatu, urung 200 buah lagu ti dikeluarka KMP mujur direjister ba MRSB lalu lagu tu udah dipasuk dalam sistem MRSB,” ku iya.
Gibson mansutka jaku nya rambau ditanya pemberita pengudah Program Ngelancharka Lagu Rajai Ba Ati ari Olivia C ba Opis KMP Sdn Bhd ditu, malam kemari.
Tandu iya, MRSB siti pelasar ti manah ungkup raban pemekuh muzik ba Sarawak laban serikat nya diaku nyadi pengari ngumpul enggau ngagihka royalti ari lagu ti dikeluarka lebuh lagu sida ditebah ba stesyen radio, televisyen, palan pemerindang, palan bebeli barang, kedai, hotel enggau ke bukai ti dikumbai end user.
“Baka Organisasyen Pengatur Kolektif (CMO) ke bukai, MRSB meri pemaik ngagai kitai laban ulih mantu ngumpul enggau ngagihka royalti.
“Naka diatu, MRSB udah meri royalti ngagai kami ujung taun 2023 tu tadi.
“Nangkan nya, MRSB tu ditumbuhka peranak menua Sarawak tu empu lalu sida landik agi enggau pekara ti nyadi ba menua kitai tu empu,” ku iya.
Ku iya, royalti nya digumpul ari end user kelimpah ari royalti arus penyambung.
Nya alai, iya madah, enti ari sukut penatai pemisi, pekara tu deka meri pemaik ngagai bala penanyi, penengkebang leka lagu enggau penebah perengka muzik.
