Lelaki Singapore parai, lori tepawah, labuh ke lebak

KANOWIT: Siku lelaki peranak Singapore bebadi nyawa pengudah lori 10 tan dibai iya tepawah lalu labuh ke lebak 70 meter penalam ba Jalai Ngungun-Song, Kanowit lemai Hari Tiga tu tadi.

Lebuh penusah nyadi urung pukul 5.30 nya, niang benama She Boon Hong, 20-an, benung ba pejalai ari Song ngagai Ngungun ke alai iya dipelaba enda tetagangka entukar nya sebedau tepawah ke sepiak kanan jalai lalu labuh ke lebak.

Ketuai Opis Bomba Kanowit, Arrahman Chik madah, niang parai tekala nya ba penusah nyadi ketegal balat bakal ba pala enggau tubuh iya.

Taja pia ku iya, siku kelindan peranak menua tu,19 taun, begulai enggau niang semina bakal mimit aja.

“Deriba lori tepekul di baruh lori lalu mujur dikeluarka raban ari Opis Bomba Kanowit sereta disaup raban ari Opis Bomba Song.”

“Bangkai niang mujur dibai ngagai jalai ngena tali,” ku iya ba sebengkah penerang malam kemari.