Lima sekula entarabansa ungkup nembiak pintar

“Naka diatu, kitai deka ngaga lima buah dulu ngena silibus subjek entarabansa baka ba Universiti Cambridge.” – Abang Johari

SARATOK: Perintah Sarawak deka ngaga lima buah sekula seikas entarabansa dikena ngangkatka tikas pemanah pelajar ngagai bala nembiak menua tu.

Kepala Menteri Datuk Patinggi Abang Johari Tun Openg madah, inisiatif tu sebagi ari strategi perintah nempa mayuh agi orang ke pintar runding ba Sarawak dudi hari.

Ku Abang Johari, sekula nya deka disikap perengkaguna pemadu baru nyengkaum buding ungkup bala nembiak.

“Naka diatu, kitai deka ngaga lima buah dulu ngena silibus subjek entarabansa baka ba Universiti Cambridge.

“Anak orang berikan enggau orang bukai ke pandai dalam pelajar mega deka dipindah belajar ba sekula tu lalu semua bayar rejister deka ditanggung Perintah Sarawak,” ku iya.

Abang Johari mansutka jaku nya rambau bejadika Pengawa Ngintu 100 Taun SK Abang Leman Kabong, ditu tadi.