Lubok Tamang deka dikemansang

DEBAK: Lubok Tamang nyadi sebagi ari sitak keterubah diperambu ungkup pemansang Taman Betanam Betupi Saribas enggau renggat keterubah udah dikemendarka Perintah Sarawak.

Adun Saribas Mohammad Razi Sitam madah, taman nya sebagi ari program pemansang pengawa betanam betupi di Saribas ti deka ngepunka projek Agropolitan Bukit Sadok enggau Tibang Pemakai ba Bagi Menua Betong.

“Inisiatif nya diperambu ngagai Perintah Sarawak nengah Opis Menteri Betanam Betupi Moden, Tanah Adat enggau Pemansang Kandang Menua (MANRED).

“Ba renggat keterubah, kitai udah bulih pemendar ngemansangka Lubok Tamang tu.

“Pengawa ngemasangka sektor betanam betupi ba Saribas tu ngaul kerejasama enggau Opis Betanam Betupi enggai Sitak Pemansang Betanam Baetupi Begulai (IADA) Kalaka Saribas Betong,” terang iya pengudah program randau projek nanas, ditu kemari.

Ku Razi, Perintah Sarawak diatu benung ngaga jalai baru ba sitak Lubok Tamang dikena ngenyemakka penyauh pejalai ari urung 45 kilometer nyadi semina semilan kilometer aja pengudah beberapa taun ke udah Kepala Menteri Datuk Patinggi Abang Johari Tun Openg ngemendarka agih belanja penyampau RM42 juta nya.

Ungkup penerang semua, perintah udah mayar semua bayar pampas ungkup sekilometer keterubah.

Terang iya, nengah aum enggau piak Opis Menteri, Opis Betanam Betupi, Opis Entali Ai enggau Parit (JPS), Opis Tanah enggau Survey (JTS) sebedau tu setujuka sitak nya deka ditanam nyiur, nanas, lingkau, gandum sereta utai tanam bepengulih bukai.

Suara Sarawak