SERIAN: Lusiana Steward, 20, nurai sejarah kediri empu pengudah dipadu nyadi champion ‘Dara Main Bol’ (Kumang Main Bol) ba Pekit Kumang Main Bol Gerempung Main Bol Bagi Menua Serian (SFA) 2023.
Ba renggat kepenudi pekit nya ti diatur ba Palan Konvensyen Serian (SCS) malam ensanus, anak asal Sibu nya mujur ngalahka tujuh finalis ti bukai.
Berebak enggau nya, Lusiana mujur mai pulai perais mata duit RM2,000, trofi enggau sekeda perais ti bukai.
Nangkan nya, penuduk kedua dipenggi Fleyrissa Chrishella Galvin Tegong, 19, lalu Naziatul Aisha Esperi, 20, ba penuduk ketiga.
Seduai bela mai pulai perais mata duit RM1,500 enggau RM800 siku sereta trofi enggau perais bukai.
Ukai naka nya aja, ba malam berega nya, seduai bela ngempu anugerah bukai baka Anugerah Dara Fotogenik diempu Fleyrissa ti mai pulai perais mata duit RM200.
Aisha ngempu Anugerah Dara Pemadu Tebilang enggau Anugerah Pekayan Pemadu Manah lalu mai pulai perais mata duit RM400.
Penuduk keempat dipenggi Joecylyin Amil, 26, lalu mai pulai perais mata duit RM350.
Elmelda Erik, 17, ti ngempu penuduk kelima mai pulai perais mata duit RM350 sereta Anugerah Best Catwalk enggau perais mata duit RM200.
Tiga finalis ti bukai iya nya Priscilla Simon, 23, Maximilia Octovia Atin, 17, enggau Traclyana Voon, 17 ti ngempu Anugerah Dara Bebakih lalu mai pulai perais mata duit RM200.
Kaban Kunsil Nengeri (ADUN) Bukit Semuja, John Ilus enggau Presiden SFA, Philip Jabu diberi basa nyuaka perais ngagai bala pemenang.
