SERIAN: Pemajik Lusiana Steward, 20, nyata meri pengelebih ngagai iya dipadu nyadi champion seraya bulih gelar Kumang Gawai Siburan 2024, Kampung Sungai Barie, Serian, ujung minggu tu tadi.
Anak asal Kampung Sungai Barie, Serian ngalahka dua pemekit iya nya Priscilla Sidi, 21, ari Sibu bulih gelar lulong seraya Zyinia Zyian, 18 ari Kota Samarahan bulih gelar Selinggar Matahari.
Pemujur nya ngujungka Lusiana Steward mai pulai perais mata duit RM3,000 sereta perais bukai.
Seraya, Priscilla Sidi enggau Zyinia Zyian bela ngempu mata duit RM2,000 enggau RM1,000 nyengkaum perais bukai.
“Gaga enggau enda ngadang pengudah bulih gelar Kumang Gawai Siburan 2024 malam nya.
“Aku endang enda nyangka deka menang laban bala pemekit bukai dipeda chukup landik, bajik sereta pintar,” ku Lusiana ngenang pemujur iya ngempu gelar nya.
Lusiana mega ngaku bebendar bepekit enggau dara bajik bukai laban sida endang landik sereta datai ari kandang menua bukai.
Tuai Rumah Kampung Sungai Barie, Ambrose Budet Jabu mega meri terima kasih enggau pengaga ati ngagai semua pemekit nya.
“Aku ngarika komiti pengatur deka meri besai terima kasih ngagai semua penyereta ti udah ngambi bagi ngemujur pengawa tu.
“Terima kasih mega nuju semua ti udah meri sukung enggau kerejasama ngemujur pekit tu,” ku Ambrose.
Nya alai, iya ngarapka pemanah kerejasama entara semua raban deka ditan enggau diterus dudi hari.






