Makmal komputer digaga kena nyikap anak Sarawak enggau subjek digital

KUCHING: Penyampau 1,265 buah sekula di selampur Sarawak deka disikap enggau makmal komputer.

Kepala Menteri Datuk Patinggi Abang Johari Tun Openg madahka perambu ngaga makmal komputer tu endang dikena nyeridi bala nembiak sekula belajarka subjek digital kelebih agi bekaul enggau ekonomi digital.

“Nitihka rikod ari Opis Menteri Pelajar pengawa tu begunaka RM12 juta dalam timpuh tiga taun.

“Perintah Sarawak ngemeratka subjek Sains, Teknologi, Injinir enggau Matematik (STEM) dalam ngerandang jalai nuju ekonomi digital,” ku iya.

Abang Johari bejaku munyi nya rambau Program Nasih Tanah Begunan Opis Baru enggau Nyeruri Begunan Akedemik Sekula Primari (SK) Merpati Jepang ditu, ensana.

Ku iya, perintah endang ngarapka bala nembiak sekula meretika pekara komputer nya kebuah sekula primari di menua tu deka naka ulih disikap enggau makmal komputer ti meruan.

“Enti suba lebuh deka ngaga langkar bengunan kitai ngena chara lama tang diatu langkar begunan nya ulih digaga ngena sistem stimulasyen.

“Maya pengerekai penyakit Covid-19 semua dagang dipejalai nengah online baka meli ikan enggau kuih, mayar barang ti dibeli pan ngena online.

“Nya kebuah makmal komputer tu amat beguna ngagai nembiak sekula awakka sida bisi penemu ti dalam ngagai pekara digital jemah,” ku iya.

Ngelansa pasal SK Merpati Jepang, Abang Johari madahka projek ngaga begunan opis enggau nyeruri begunan sekula nya nelan belanja RM10.38 juta.

“Begunan di tengah sekula tu udah repuk sereta enda selamat endur diau.

“Nya kebuah Perintah Sarawak ngaga sekula tu enggau nyendiaka perengkaguna ti manah ungkup nembiak.

“Entara perengkaguna ti deka digaga ila nyengkaum ‘lift’ ba opis sekula dikena ngemuntangka pejalai bala pengajar ngagai opis,” ku iya.

Sama bisi datai Menteri Pelajar, Sains enggau Pansik Teknologi Datuk Amar Micheal Manyin Jawong, Menteri Muda ba Opis Kepala Menteri (Pekara Islam enggau DBKU) Datuk Dr Abdul Rahman Junaidi, Sapit Ketuai PBB Pampang Dun Satok Datuk Ibrahim Baki enggau ke bukai.

Suara Sarawak