Mantar Gawai KSRES nerenak penyerakup

KUCHING: Pengerami Mantar Gawai diatur Kelab Lumba Rekreasyen Emmanuel Samarahan (KSRES) dikearap ulih nempa tanggam rat kaul begulai enggau pangan diri.

Presiden KSRES Gidien Dayos madah, pengerami richah digulu 500 sida ke diau ba genturung nya.

“Pengerami tu endang diatur ninting taun dikena ngerami penatai Gawai Dayak enda lama agi.

“Tanggam rayat deka nempa penyerakup lalu tu deka ngemai kitai bansa Dayak sepenemu enggau seati nyingkang nuju pemansang nunda bansa bukai ke udah dulu maju,” ku iya.

Pia mega ku Gidien, kitai Dayak begunaka sukung enggau saup ari pangan diri ngambika ulih mansang ba semua sukut baka ekonomi, pelajar, pekara rama kelimpah ngetanka gaya idup enggau adat asal kitai bansa.

KEMERAH… See Chee How (kanan, belakang) disempulang Gidien (dua kanan, belakang) begambar enggau bala pemenang Pekit Kumang Malam Mantar Gawai diatur KSRES.

“Kebuah pia laban pekara tu beguna amat setipak enggau juluk perintah menua dekaka kitai ngetanka kaul serakup lalu begulai bebaik enggau pangan diri.

Mayuh atur pengerami udah dirintaika kami ngambika bala gauk agi bebaik, begulai dalam pemaik sereta bebasaka pangan diri laban semua pengawa bisi lebas.

“Entara atur pengerami nya baka pekit belagu, pekit Keling enggau Kumang ungkup nembiak 15 taun enggau biak agi sereta chabut tikit benasit.

Pengerami mujur diatur ba Rumah Asap Tabuan Dayak lalu udah dipenyadi Adun Batu Lintang See Chee How kena 27 Mei tu tadi.

Gidien madahka See Chee How chukup kemerah ari gaya iya nanya berita sereta betabi jari enggau mensia mayuh ke bisi datai rambau atur pengerami malam nya.

Nangkan nya, iya meri besai terima kasih ngagai sukung Rumah Asap Tabuan Dayak enggau mensia mayuh laban udah meri awak begulai sama ngintu Gawai malam nya.