KUCHING: Marylyn Velarie Bolovin dipadu nyadi champion Pekit Unduk Ngadau (Pekit Kumang) Kaamatan Gerempung Main Asal Kadazan Dusun (KDCA) Sarawak.
Ngembuan peninggi 169 cm, dara bajik beumur 21 taun nya mujur ngalahka tujuh iku finalis bukai lalu mai pulai perais mata duit RM1,000, trofi, setipikit enggau perais bukai.
Nya ngujungka iya deka ngarika KDCA Sarawak rambau Pesta Kaamatan renggat Nengeri Sabah ti ditaga diatur ujung bulan tu.
Pekit Unduk Ngadau Kaamatan KDCA Sarawak tu udah diatur ba Hotel Imperial kena 30 April 2023.
Bini Sapit Menteri Dagang Temuai, Industri Kreatif enggau Seni Pemerindang Datuk Snowdan Lawan, iya nya Datin Melinda Claudia Bucking udah nyadi temuai dipebasa nyuaka perais ngagai bala champion malam nya.
Dara bajik ari Kudat, Sabah tu peturun Rungus ti benung nampung pelajar ba Palan Pematih Pengajar (IPG) Batu Lintang.
