KUCHING: Festival Muzik Kampung Ujan Sedunya (RWMF) terus nyagu nama Sarawak pengudah diaku nyadi festival muzik kelapan pemadu manah dunya seraya negap nama nengeri tu nyadi palan dagang temuai budaya betikas antarabansa.
Menteri Dagang Temuai, Industri Kreatif enggau Seni Pemerindang Sarawak, Datuk Seri Abdul Karim Rahman Hamzah madah, pengawa ngaku nya mandangka pemujur Sarawak ngena pengaya pesaka budaya, pemanah rampa menua sereta bemacham etnik nyadi pematak temuai ari serata dunya.
“Pengawa ngaku tu ukai semina ngemegah Sarawak tang mega mandangka inisiatif meruan kitai ngelaku budaya lokal ba renggat global mansutka asil ti signifikan,” ku iya.
Karim madah munyi nya ba aum pemberita serimbai RWMF 2026 di Kampung Budaya Sarawak, Hari Lima tu tadi.
Ku iya, kenyau ari dipejalai manggai 30 taun ti udah enggau semina urung 300 pengusung, RWMF diatu mansang nyadi entara festival muzik pemadu tebilang ba dunya sereta nyadi ikon dagang temuai ti gah ba Sarawak.
Ku iya, pemujur nya mandangka pemujur Perintah Sarawak ngetan enggau nyagu pesaka budaya 34 etnik nengeri tu ba panggau antarabansa lalu enda nejuka identiti sereta penyelai serap komuniti.
“RWMF ukai semina festival muzik tang mega nyadi pelasar strategik ngelaku seni, budaya, pesaka asal enggau pemeruan rampa menua ti meri rega tambah ngagai pemansang industri dagang temuai nengeri tu,” terang iya.
Ba pekara sama, iya madah ke industri dagang temuai Sarawak diatu mansutka asil ngelui RM1 bilon ninting bulan kenyau ari dua taun ti udah diperansang penyampau temuai ti nambah ti meri pemaik ngagai sektor hotel, pengangkut, pemakai enggau ai irup sereta bemacham industri sukung bukai.
Ku iya, pengawa ngatur pengerami betikas antarabansa baka RWMF ukai semina ngeranchak ekonomi nengeri tang mega nambah peluang dagang enggau nambah penatai pemisi komuniti lokal.
Ngenang timbal RWMF 2026, iya nerang ke pengawa bejual tikit mengkang ngemantupka ati lebuh urung 22,000 tikit mujur dijual taja napi penyarut geopolitik global enggau tambang penerebai ti nambah.
Penyampau nya, ku iya, semina nurun urung dua peratus dibanding selinting 23,000 tikit taun nyin tadi. – EDISI UKAS
