KUCHING: Siku anak mit ti beumur setaun dua bulan, Maxy Perez Davis Mancha begunaka bantu RM180,000 dikena nampung ungkus berubat enggau bebuntas mindahka atau ti dipelaba urung RM200,000.
Turu bantu khas udah ditumbuhka dikena mantu Maxy ari Sarawak ti diatu benung ditepan igi penyakit Biliary Atresia, iya nya sebansa penyakit ti ngeruga tali seput enggau atau.
Maxy sebedau tu kala diputung ngena chara berubat dikumbai Kasai, tang gaya atau iya diripot belinsur jai.
Penusah nya ngujungka perut majak besai ketegal atau iya kembai sereta kering, kelimpah ari bacha tikas atau ti ngirauka ati.
Diatu, Maxy semina bepanggai ba chara berubat mindahka atau dikena meri peluang ngagai anak mit nya mansang besai enggau bepengerai.
Asil peresa perubat madah ke indai iya, Stephanie Munira Sulan Muking nyadi pemeri ati ti engkeman ngagai Maxy dikena nangkup prosedur nya.
Abis nadai, 20 peratus atau indai iya deka dipindah dikena nyilih atau Maxy ti udah jai.
Taja pia, sida begunaka belanja urung RM200,000 dikena berubat.
Naka diatu, sida sebilik agi begunaka urung RM180,000 dikena nangkup belanja ti diguna dikena nyaup enggau nyuman tudah Maxy.
Mensia mayuh ti deka meri pemeri tau meri ngagai akaun MAYBANK 5515 7530 7417 ngena nama Gerempung Pengintu Pengelantang Nadi Permata Malaysia ngena referens ‘Bantuan Maxy BA’.
Sebarang tanya bukai tau telefon nuju Stephanie Munira (indai Maxy) ba lumur 012-2964119 tauka Mars (NPM) ba lumur 013-7444501.
Mensia mayuh mega diperansang bekunsi cherita Maxy ngambi mayuh agi orang ulih nyaup meri pengidup ti meruan agi ngagai anak mit tu.
