Isu tu mayuh nyadi ba Lubok Antu ketegal nikah enggau peranak menua luar
“Bisi sida nya tusah laban rumah jauh ba menua ulu tusah deka ngerejista pengada anak enggau lengkas ba Opis Pengerejista Bansa.”
KUCHING: Opis Menteri Dalam Menua (KDN) patut beratika nasip mayuh peranak Sarawak bedau bulih status peranak menua ba menua diri.
Kaban Parlimen Lubok Antu, Jugah Muyang madah ketegal status peranak menua bedau diaku, pengidup sida nyadi tusah.
“Anang mih pilih kasih. Agi mayuh rayat Sarawak bedau bulih status peranak menua di nengeri tu.
“Tu ngujungka sida enda ulih minta Bantu Nupi Pengidup (BSH),” ku iya nengah sebengkah penerang, kemari.
Iya madah mayuh raban sida kena pangka penusah ba pekara pelajar baka orang bukai, lebih agi maya minta Skim Nginjau Bup Teks.
Pia mega, ku iya semina sebagi ari sida ulih masuk universiti perintah laban sida patut bebayar baka nembiak menua lyar lalu enda ulih ngaga pinjau pelajar ari perintah.
Kenu ku Jugah, agi mayuh anak Sarawak bedau bulih status peranak menua taja apai indai sida udah ngembuan status peranak menua.
Iya madah isu nya mayuh nyadi ba Lubok Antu ketegal nikah enggau peranak menua luar laun ngerijster surat nikah sereta isu bekaul enggau pengarap.
“Bisi sida nya tusah laban rumah jauh ba menua ulu tusah deka ngerejista pengada anak enggau lengkas ba Opis Pengerejista Bansa.
“Bisi nya mega agi enda nemu sentang pemesai guna peranak menua ngujungka sida laun ngerejista diri nyadi peranak menua,” ku iya.
Berebak enggau nya, Jugah mega ngansak perintah patut ngemuntang peminta status nyadi peranak menua mendam ungkup peranak luar ke nikah enggau peranak menua tu ke udah lama diau di Malaysia.
