SPAOH: Perintah Sarawak terus chakah negap pemansang menua pesisir nengah pengawa bejalaika bemacham inisiatif enggau projek besai empas baka ti dirintai ba Bajet Sarawak 2026.

Sapit Premier Sarawak, Datuk Amar Douglas Uggah Embas madah, mayuh bantu udah dikemendar dikena ngeranchak ekonomi rayat kelebih agi ba sektor betanam betupi ti nyadi pun penatai pemisi besai komuniti menua pesisir.

Uggah bejaku munyi nya rambau Program Merarau Mantar Krismas Kunsil Nengeri (DUN) Bukit Saban 2025 ti diatur Gerempung Tuai Rumah (GTR) Ulu Layar di Balai Mayuhguna Spaoh ditu, kemari.

Uggah ti mega Kaban Kunsil Nengeri (ADUN) Bukit Saban madah, Perintah Sarawak bela ngatur sesyen randau begulai enggau tuai komuniti enggau tuai raban bansa (KMKK) ungkup ngelanggur Bajet Pemansang 2026 ti ngemerat projek ti amat meri empas enggau pemaik ngagai rayat.

Iya nyemetak madah, pangku pengawa tuai raban bansa, Komiti Pemansang enggau Pengelikun Genturung Pendiau (JKKK) sereta komiti rumah panjai beguna dikena matau pejalai projek pemansang ngambi lanchar enggau bisi integriti.

“Agi bisi komuniti menua pesisir enda nemu pasal bantu ti disedia perintah, nya alai, pangku pengawa bala tuai komuniti beguna amat dikena nentu penerang datai ba rayat lalu bantu ulih dikena enggau manah,” ku iya.

Kelimpah pemansang infrastruktur, ku iya, sukut sosial mega bela diberi perati nyengkaum pelajar bala anak, pengelikun komuniti sereta pemar ari empas negatif teknologi dikena nyaga pengelantang timpuh panjai komuniti menua pesisir. Ba program nya, Uggah nyua chek sepenyampau RM213,000 ari Unit Pekara Pengarap Bukai (UNIFOR) ngagai sekula mission iya nya Sekula Primari (SK) St. John, Nanga Tiga.

Ungkup rikod, bisi 422 pekebun di sitak Layar ba baruh DUN Bukit Saban bulih pemaik ari bantu perengka bekebun naka diatu. Bantu nya mungkur sum lada enggau sawit lalu 4,788 guni sum udah diberi ngagai raban nya. Pia mega, bisi 44 peminta baru ungkup kededua komoditi ti benung ba proses ngemendar. – TVS