TATAU: Mayuh projek pemansang udah enggau benung digaga sereta diperambu ungkup Dun Kakus.
Menteri Muda ba Opis Kepala Menteri (Undang- Undang enggau Adat Bumiputera), Datuk John Sikie Tayai madah diatu menua ba sitak Ulu Kakus udah ngasaika perengkaguna kuasa solar.
Udah nya, bekal karan ari grid deka disambung ari Jematan Kelebu nyentuk ke Rumah Ado di Kakus, ku iya.
Kelimpah nya, ku iya peranak ba sitak Sangan enggau Muput mega deka ngasaika bekal karan chara grid enda lama agi.
Pia mega ungkup rayat ba Ulu Anap, sida deka ngasaika bekal kuasa solar, ku iya rambau bejadika jalai simen enggau Biro Indu JKKK Rumah Serai, Sungai Sepulau, Muput Kanan, ditu sehari tu.
Adun Kakus nya madah iya enggau Adun Pelagus, Wilson Nyabung Ijang udah berandau enggau Sapit Kepala Menteri Tan Sri Datuk Amar Dr James Jemut Masing pasal peminta ngaga jalai raya nuju Rumah Bilis, Ulu Anap ke Nanga Merit, Kapit.
Ku iya, Projek Projek Transformasyen Menua Pesisir (RTP) ungkup taun 2020 tejanggal mimit ketegal Atur Tagang Pejalai (PKP).
Tang ku iya, semua projek nya ditampung nyentuk tembu taja iya laun mimit tembu ari taga sebedau tu.
Ba pengerami nya, iya ngungkupka geran Projek Mit Menua Pesisir RM36,000 ngagai JKKK Rumah Serai, lalu RM4,000 ungkup biro indu sida.
Bela nerima chek MRP iya nya JKKK Rumah Samun Anyut enggau JKKK Rumah Sekaya Tulong, Penyarai.
