BINTANGOR: Anak besapit dua, Dorika James, 19, mujur ngalahka 15 penyereta bukai sebedau ke dipadu ngempu gelar Ratu Etnik nyerumba Pengerami Limau 2019, malam tadi.
Dorika asal ari Rumah Liba Nanga Pua Julau agi belajar ba Sekula Sekondari (SMK) Meradong.
Pemujur nya ngujungka dara bajik tu mai pulai perais duit enggau trofi.
Dorika maya dirandau madah, pemujur nya chukup besai reti ba iya laban udah suah alah ba pekit ke sebaka ngelama tu.
“Aku enda kala bulih penuduk ke manah ba pekit pemajik ngelama tu. Tambah mega, suah ba penuduk ke pemadu baruh. Kepenudi nyereta pekit tu maya Pengerami Pakan apin lama ke udah.
“Nya alai, pemujur serak tu endang nyadi pengingat ke chukup manis ba pengidup aku,” ku iya ke ngembuan juluk deka nyadi pengajar.
Pekit ratu etnik kontemporari bemotifka Sarawak nya endang sebengkah pengerami ke chukup dikerinduka bala temuai ti ngulu Pengerami Limau serak tu.
Lumur dua dipenggi Nurul Mira Farhana Jahli, udah nya Afieka Afierah Suhailee ari Bintangor bulih lumur tiga.
Berebak enggau nya, Ivy Kiung Xie Er enggau Nebine Vincent bela bulih lumur empat enggau lima.
Program nya bela digulu Sapit Residen Sarikei, Abang Porkan Budiman, Pemesai Pelilih Meradong, Baijuri Bidin, Pemantu Pemesai Pelilih Meradong, Thomas Kendawang enggau bala ketuai raban bansa.
