BINTULU: Mensia mayuh patut pintar runding ngambi enda mudah kena tipu bala scammer ti majak pintar nipu orang, ku Kaban Kunsil Nengeri (ADUN) Tanjong Batu, Johnny Pang Leong Ming.
Nya alai, iya nyemetak madah, pengawa meri penyedar bekaul chara nipu bala scammer patut dikemayuh ke agi.
Iya mega ngelalau sida ti kala ngembuan peneleba kena tipu siber tauka agi kena tipu ngaga ripot polis tauka betelefon terus ngagai Palan Timbal Pengawa Nipu Nasional (NSRC).
“Enti nuan kala ngasai peneleba sebaka, nuan diperansang bekunsi penemu enggau strategi nipu nya ngagai bala balih enggau diri sebilik ngambi sida bela bejimat,” ku iya.
Pang mansutka jaku nya rambau meda filem kereja pengasih No More Bets ba Ashtar Galatic Cinema (AGC) Bintulu Commerce Square ditu, malam ensanus.
Iya muji inisiatif raban AGC Bintulu Commerce Square ngatur program kereja pengasih nya seraya ngumbai nya pelasar pemadu manah dikena mantu nambah penyedar komuniti bekaul pengawa nipu nya.
Nya mega, ku iya, mantu komuniti ngelala chara nipu siber ti majak nyadi sereta nyeliahka sida ari nyadi siku orang ti kena tipu.
Pang ngelalau mensia mayuh ngambi enda bekunsi tauka mantaika penerang diri baka lumur akaun bank, kad pengelala enggau ti bukai ngagai orang ti enda dikelala.
