KUCHING: Pengerami Makai Lemai Gawai Dayak 2023 deka diatur ba Pan Aum Borneo Kuching (BCCK) kena 7 June tu.
Sapit Premier Sarawak ti mega Chairman Komiti Besai Pengerami Gawai Dayak 2023, Datuk Amar Douglas Uggah Embas madah, pengerami nya ila disadang nerima penatai tuai dipebasa Menteri Besai Datuk Seri Anwar Ibrahim sereta bini, Datuk Seri Wan Azizah Wan Ismail.
“Kelimpah ari nya, kitai mega disadang nerima temuai dipebasa, Premier Sarawak Datuk Patinggi Abang Johari Tun Openg sereta bini, Puan Sri Datuk Amar Juma’ani Tuanku Bujang.
“Bisi aktiviti pemandang khas enggau main asal ari raban bansa Dayak deka dibantai malam nya ila,” ku iya.
Uggah bejaku munyi nya rambau aum pemberita Komiti Pengatur Pengerami Gawai Dayak 2023 ba BCCK ditu, tadi.
Ku iya, sekeda aktiviti deka diatur malam nya baka Pekit Kumang, Dayung Sangon enggau Keligit 2023, pengawa mandang main asal enggau Pekit Keling, Dari Pagon enggau Belawan Gawai 2023.
Ku iya, kelimpah pengerami makai lemai, komiti nya mega bisi ngatur program Niti Daun enggau Festival Bazar Gawai taun tu.
