KUCHING: Kerejasama strategik entara AFFIN Bank enggau serikat penerebai, AirBorneo endang dikelalu laban disadang ulih ngerembaika rentayan kaul serata Asia Tenggara.

Premier Sarawak, Datuk Patinggi Tan Sri Abang Johari Tun Openg madah, kerejasama tu deka mai penguntung besai ngagai penguna, kelebih agi pemegai Kad Kredit Borneo AFFIN Bank ti baru dilanchar di Sarawak kemari.

“Inisiatif nya kelai pengawa negapka ekosistem pekara wang digital enggau pengelantang penerebai di rantau tu. “AFFIN Bank udah mantaika Kad Kredit Borneo.

“Singkang tu siti perengkaguna ti ulih dikena ngatur kaul sida enggau AirBorneo,” ku iya.

Abang Johari bejaku munyi nya  lebuh ditanya pemberita pengudah bejadi Opis AFFIN Bank Pampang Hikmah Exchange ba Hikmah Exchange ditu, kemari.

Ku Abang Johari, inisiatif tu ukai semina ngemuntang pengawa meli tikit bilun tang mega ulih meransang gaya pengidup digital ba komuniti sereta nyungkak penumbuh ekonomi nengeri enggau menua Borneo.

“Ambi ke chunto, lebuh kitai deka meli tikit bilun AirBorneo, iya ulih digaga terus ngena Kad Kredit Borneo, asal orang nya bisi kad nya,” ku iya

. AirBorneo sebedau tu madah ke perambu deka ngerembaika operasyen sida ngagai menua di Asia Tenggara seraya AFFIN Bank ngemeratka komitmen nyendia produk pekara wang ti inklusif sereta semak enggau peminta sereta guna komuniti di Sabah enggau Sarawak. Kerejasama nya dipechaya ulih meri peluang baru ba sektor penerebai bilun enggau bank, kelimpah meri pemaik ngagai rayat Borneo nengah perengka guna transaksyen ti jampat, muntang sereta likun.