KUCHING: Landik, lurus enggau strategik ngatur belanja terus ditegap nentuka pemansang nengeri nyamai diadu ngambi ulih ngelantangka rayat.

Premier Sarawak, Datuk Patinggi Tan Sri Abang Johari Tun Openg madah, pengelandik ngatur belanja bepun ari nemu bagi penatai pemisi sebedau dibagi bela ngagai tiga batang pengawa.

Ku iya, pengawa magi belanja nya belalauka guna, meranak puku enggau disimpan ke penabat.

“Enti kitai nitih prinsip tu, kitai ba jalai ti betul. Enti enda, penanggul akauntabiliti belanja deka nyadi lalu suah agi bepun ari proses ti enda betul,” ku iya.

Abang Johari nyebut pekara nya lebuh bejadi Program Konferens Transformasyen Ngatur Belanja Sektor Perintah (PSFTC) 2025 ditu ensanus.

Iya madah, Sarawak patut belajar ari menua bukai baka Finland, Sweden enggau Norway ti mujur ngemansangka ekonomi sida, taja menua mit tang landik ngatur belanja.

“Baka Norway, taja baru ngereja minyak enggau gas entudi kitai, sida diatu udah nyadi menua ti kaya laban sida nemu ngatur asil enggau betul.

“Tang kitai balat agi bekelikuh ke mayuh pekara kenyau ari taun 1910,” ku iya nyemetak.

Nya alai ku Abang Johari, Perintah Sarawak ngena strategi numbuh Turu Pesaka Bansa nyadi belanja penabat menua tu ungkup pengelantang dudi hari.

Iya madah, Perintah Sarawak mega naka ulih nentuka asil nengeri baka chukai enggau penatai pemisi ari sektor minyak diberi pulai baru nengah polisi ti mai pemaik ngagai rayat.

“Tu mih disebut aku proses re-engagement, ke alai polisi kitai meseti mai pemaik ngagai pengidup rayat,” tandu iya. Konferens ngena rambai jaku Strengthening Public Finance for a Sustainable Future nya nyadi pelasar negap atur belanja sektor perintah nengah bekunsi penemu, randau enggau input ari raban ti anda penemu.

Sama datai, Menteri Industri Pemakai, Komoditi enggau Pemansang Kandang Menua Sarawak, Datuk Sri Dr. Stephen Rundi Utom, Sekretari Perintah Sarawak, Datuk Amar Mohamad Abu Bakar Marzuki enggau temuai dipebasa bukai.